Хитай ташқи ишлар министирлиқи б д т ни «җуңгониң ички ишлириға арилашти» дәп әйиблигән

Мухбиримиз қутлан
2017-05-08
Елхәт
Пикир
Share
Принт

Хитайда тутқун қилинған кишилик адвокатлиридин шйе яңниң делоси хәлқарада күчлүк тәсир пәйда қилған делоларниң бири.

Мәзкур дело 2015-йили язда хитайда тутқун қилинған йүзлигән адвокат вә иҗтимаий паалийәтчиләрниң делоси билән биргә «709 басқуни» дәп аталған.

Кишилик һоқуқ адвокати шйе яң тутқун қилинғандин кейин хитай сақчилириниң уни узун мәзгил ухлатмаслиқ, қийнаққа елиш вә хорлаш қатарлиқ усуллар билән сорақ қилғанлиқи һәққидә хәвәрләр тарқалған.

Хитай компартийәсиниң хәлқара канийи һесабланған «йәр шари вақит гезити» бүгүн шйе яңниң сотлиниши һәққидә мәхсус видеолуқ хәвәр елан қилған. Униңда шйе яңниң еғизидин: «мән һәрқандақ шәкилдики қийнашқа учримидим,» дегән сөзни дегүзгән.

Униңда шйе яңниң сотчиға мундақ дегәнлики көрситилгән: «мениң каллам ғәрбниң қанун идийәлири билән ююлупту. Шу вәҗидин мән җуңгода ғәрбниң қанунчилиқ системисини тикләшкә урунуп, мәвҗут системини ағдурмақчи болдум.»

Чаңша оттура хәлқ сот мәһкимиси шйе яңни «дөләт һоқуқини кәмсундурушқа вә сот тәртипини бузушқа урунған» дегән җинайәт билән әйиблигән.

Шйе яңниң адвокати чен җйәнңаң өткән һәптә тутқун қилинғандин кейин б д т кишилик һоқуқ ишханиси хитайни әйиблигән.

Һалбуки, б д т дики 5 даимий әза дөләтниң бири болған хитай бүгүн өзиниң ташқи ишлар министирлиқи арқилиқ инкас қайтуруп, б д т ни «җуңгониң ички ишлириға арилашти,» дәп әйиблигән.

Пикирләр (0)
Share
Толуқ бәт