2021-Йили белгийә һөкүмәт торлириға қаритилған тор һуҗуминиң кәйнидә хитай җасуси барлиқи ашкариланған

Вашингтондин мухбиримиз ирадә тәйярлиди
2024.04.18

2021-Йили майда белгийә һөкүмәт тор бәтлиригә қарши елип берилған һәмдә белгийә парламентиниң уйғурлар һәққидики испат аңлаш йиғининиң кечикишигә сәвәб болған хаккерлиқ һуҗуминиң кәйнидә хитай җасуслири барлиқи дәлилләнгән.

Белгийәдики хумо “HUMO” вә апачи “Apache” намлиқ хәвәр торлириниң хәвәр қилишичә, 2021-йили 5-айниң 4-күни, белгийә һөкүмитиниң хизмәтлириниң ақсап қелишиға сәвәб болған зор көләмлик хаккерлиқ һуҗуминиң кәйнидә белгийә парламент әзаси филип девинтер (Filip Dewinter) билән узун йил қоюқ алақә қилип кәлгән хитай җасуси шаң чавчүнниң қоли бар икән.

 юқиридики икки гезит мухбирлири шаң чавчүнниң қол астидикиләр билән үндидарда қилишқан гәплирини көргән болуп, у хетидә “өзиниң белгийә парламентиниң уйғурлар һәққидә испат аңлаш йиғини орунлаштурғанлиқидин қаттиқ хапа болғанлиқини” тилға алған икән.

Юқиридики хәвәр органлириниң дейишичә, хитайниң белгийә һөкүмәт ториға қаратқан бу хаккерлиқ һуҗуми учурға яки пулға еришишни әмәс, бәлки өч елишни мәқсәт қилип қозғитилған икән.

Лагер шаһитлиридин қәлбинур сидиқ ханим әйни чағда белгийә парламентида хитайниң уйғур дияридики җаза лагерлири тоғрисида гуваһлиқ бериш йиғиниға қатнашмақчи болғанда туюқсиз кәң көләмлик тор һуҗуми йүз берип, паалийәт әмәлдин қалған вә келәр һәптигә кечиккән иди. Әйни чағда белгийә таратқулири бу һуҗумниң кәйнидә хитай һөкүмити барлиқи һәққидики гуманлирини оттуриға қойған болсиму, уни дәлиллийәлмигән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.