Бермуда сабиқ баш министири: уйғурларни қобул қилип тоғра қилғинимдин пәхирлинимән

Мухбиримиз шөһрәт һошур
2017-06-22
Share

Бермуда роял гезити бүгүн, гүәнтанамодин қоюп берилгән 4 нәпәр уйғурниң бермудаға орунлашқанлиқиниң 8 йиллиқи мунасивити билән бермуданиң сабиқ баш министири еварт бровн әпәндини зиярәт қилған.

Еварт бровн әйни чағда 4 уйғурни қобул қилиш җәрянида ақсарай билән өткүзгән мәхпий сөһбәтләр вә бермудада мәсләкдашлири билән қилишқан талаш-тартишларни әсләп өткәндин кейин, өзиниң әйни чағдики бу төт уйғурни қобул қилиш қарариға бүгүн пушайман қилмайла қалмастин, бәлки иптихарлинидиғанлиқини билдүргән.

Сабиқ гүәнтанамо тутқунлиридин абдулла абдуқадир, салаһидин абдуләһәд, хелил мамут вә абликим турахун, 2009-йилиниң оттурилири бермудаға орунлаштурулған иди. Буларниң гунаһсиз һалда гүәнтанамода 8 йил ятқанлиқи, бермудаға кәлгәндин буянқи ишчан вә интизамчанлиқи һәққидә тәсиратини баян қилған еварт бровн: "әгәр һөкүмәттә йәнә бир нөвәт вәзипәм болған болса, америка вә британийә тәрәп билән сөзлишип, буларға ярдәм қилиш үчүн йәнә бир тиришип баққан вә адаләт җәһәттики кәмтүклүкләрниң толуқлинишиға күчәп баққан болаттим" дегән.

Гүәнтанамода тутуп турулған 22 уйғур мәсилисидә хитай хәлқарада узун мәзгил сәлбий тәшвиқат елип барған, уларниң тинчлиққа тәһдит икәнликини илгири сүрүп дөләтләрниң қобул қилмаслиқини тәвсийә қилған вә америкидин уларни өзлиригә қайтуруп беришни тәләп қилған. Америка хитайниң тәлипини рәт қилип, гүәнтанамодики уйғурларни албанийә, бермуда, палав вә салвадор қатарлиқ дөләтләргә орунлаштурған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт