Президент җо байдин хитай дөләт рәиси ши җинпиңни йәнә “диктатор” дәп атиди
2023.11.16
Америка президенти җо байдин хитай дөләт рәиси ши җинпиңни йәнә бир қетим “диктатор” дәп атиған.
Президент җов байдин 15-ноябир күни хитай дөләт рәиси ши җинпиң билән американиң сан-фирансиско шәһиридә учришип, икки тәрәп оттурисидики муһим мәсилиләр үстидә сөһбәтләшкән иди. Президент байдин учришиштин кейин мухбирларни күтүвелиш йиғини өткүзгәндә бир мухбир униңдин “сиз бүгүнки учришиштин кейин ши җинпиңни йәнә ‛диктатор‚ дәп атамсиз?” дәп сориған. У бу соалға мундақ җаваб бәргән:
““қараң, у бир мустәбит, йәни у биз билән пүтүнләй охшимайдиған һөкүмәт шәклини асас қилған бир коммунистик дөләтниң башлиқи.”
Пирезидент байдин бу йил 6-айда калифорнийәдики бир паалийәттә ши җинпиңни ашкара һалда “диктатор” дәп атиған, шундақла хитайниң иқтисадий җәһәттә мүшкүлатта қалғанлиқини тәкитлигән иди. Әйни чағда униң бу сөзи хитай тәрәпниң қаттиқ наразилиқиға дуч кәлгән. Пирезидент җов байдинниң бу қетим ши җинпиң билән йүз көрүшкәндин кейинму охшаш сөзни тәкрарлиши ахбаратларниң қизиқ нуқтиси болуп қалди.
Хитай ташқи ишлар министирлиқи болса 16-ноябирдики ахбарат елан қилиш йиғинида байдинниң сөзигә инкас қайтуруп, буни “интайин хата вә мәсулийәтсиз сиясий әйибләш” дәп наразилиқ билдүргән.