Байдин һөкүмити хитайниң “әдлийә пәнлири институти” ни җаза тизимликидин чиқиривәткән

Вашингтондин мухбиримиз ирадә тәйярлиди
2023.11.16

Америка байдин һөкүмити 16-ноябир күни, американиң сода қара тизимликигә елинған хитай җамаәт хәвпсизлик министирлиқи қармиқидики “әдлийә пәнлири институти” (Institute of Forensic Science) ни җаза тизимликидин чиқиривәткән.

Ройтерс агентлиқиниң хәвиридин қариғанда, бу байдин һөкүмитиниң хитайдин келиватқан вә америкада һәр йили 100миңдин ошуқ кишиниң өлүмигә сәвәб болуватқан сүний бириктүрүлгән әпйүн “фентанил” ниң америкиға киришини тосушта хитайниң һәрикәт қоллинишини қолға кәлтүрүшни мәқсәт қилидикән.

Америка һөкүмити 2020-йили бу институтни хитай һөкүмитиниң уйғурларға қаритиватқан ирқий қирғинчилиқи вә инсанийәткә қарши җинайитидә рол ойниғанлиқи үчүн қара тизимликкә киргүзгән иди. Әйни чағда американиң бу қарари хитай һөкүмитини қаттиқ нарази қилған иди.

Мәлум болушичә, бу нөвәт хитай рәиси ши җинпиң сан-фирансискода пирезидент байдин билән көрүшкәндә фентанилниң келиш мәнбәсини бир тәрәп қилиш һәққидә америка билән һәмкарлишидиғанлиқи һәққидә вәдә бәргән.

Америка кесәлликләрниң алдини елиш вә контрол қилиш мәркизиниң санлиқ мәлуматиға қариғанда, 2016-йилдин 2021-йилғичә зәһәрлик чекимлик чәккәнләрниң өлүш нисбити үч һәссә көпийип кәткәнликтин фентанилға қарши күрәш американиң күн тәртипидики муһим мәсилиләрниң бири болуп қалған иди.

Америкадики уйғур кишилик һоқуқ қурулуши болса байдин һөкүмитиниң бу қарариға наразилиқ билдүргән. Улар “X” тики инкасида уйғурлар вә тибәтләрниң ген учурлирини йиғишқа қатнашқан бу орган үстидики җазани бикар қилишниң “хата сигнал беридиғанлиқи” ни әскәрткән һәмдә бу орунниң кишилик һоқуқни дәпсәндә қилишқа қатнашқанлиқи муқәррәр, дәп көрсәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.