Bilinkénning ikki künlük xitay ziyariti xitay terepning qorsaq köpükini ipadilishi bilen bashlan'ghan

Washin'gtondin muxbirimiz irade teyyarlidi
2024.04.25

24- April seyshenbe küni xitayning shangxey shehirige yétip barghan amérika tashqi ishlar ministiri antoniy bilinkén, 25- aprél peyshenbe küni xitaydiki ikki künlük resmiy ziyaritini bashlighan.

Bilinkénning bu sepiri ikki dölet otturisida ötken yildin buyanqi eng yéngi we yuqiri qatlamliq diplomatiyelik uchrishish bolup hésablinidiken.

Roytérs agéntliqining xewer qilishiche, bilinkén peyshenbe küni shangxey shehirining partkom sékritari chén jinning bilen körüshken. U shundaqla shangxeydiki soda rehberliri, shundaqla amérikaliq oqughuchilar we xitay oqughuchilar bilen söhbetleshken.

Xewerde déyilishiche, amérika tashqi ishlar ministiri bilinkén bu qétimliq xitay ziyaritide xitay bilen nuqtiliq halda xitayning rusiye armiyesini qollash herikitini we her yili yüz minglighan amérikaliqning jénigha zamin boluwatqan fentanil ishlepchiqirishini tosush mesilisini sözlishidiken. Tashqi ishlar ministiri antoniy bilinkinmu shangxeyde turup tarqatqan sinliq bayanatida, özining bu qétimliq ziyaritining meqsetlirini tilgha élip, “Biz xitay bilen köz qarishimiz oxshimaydighan sahelerde yüzmu yüz körüshüsh, biwasite pikir almashturush üchün kelduq. Yüzmu yüz diplomatiye intayin muhim” dégen.

Tashqi ishlar ministiri bilinkén shangxeyge qedem tashlashtin bir qanche sa'et awwal, amérika pirézidénti jow baydén bash shirkiti xitayning baytdens shirkitige qarashliq tiktok epini ana shirkitidin qol üzüshke qistaydighan qanun layihesini imzalighan idi. Antoniy bilinkén bolsa xitaydiki ziyariti bashlashtin bir qanche kün burun, tashqi ishlar ministirliqining yilliq kishilik hoquq doklatini élan qilip, “Xitay hökümitining Uyghurlargha qaritiwatqan irqiy qirghinchiliqining dawam qiliwatqanliqini” tekitligen idi.

Xitay, amérikaning bu herikitidin qattiq renjigen bolup, shinxu'a tori qatarliq hökümet taratquliri tehrirat maqalisi élan qilip, “Amérikaning kishilik hoquq mesiliside xitaygha ders bérishke salahiyitining toshmaydighanliqini” ilgiri sürgen.

Xitay terep, amérika tashqi ishlar ministiri antoniy bilinkénning mexsus ayropilani shangxey ayrodurumigha qon'ghanda, uning bilen teng derijidiki emeldarni emes, belki shangxey sheherlik tashqi ishlar ishxanisining bashliqini kütüwélishqa chiqirish؛ qizil payandaz sélip hörmet qarawullirini turghuzmasliq qatarliq diplomatiye exlaqigha zit bolghan heriketler arqiliq, özining qorsaq köpükini ipadiligen.

BBC Qatarliq xelq'araliq metbu'atlarda bu ziyaret heqqide élan qilin'ghan mulahizilerde, bilinkénning xitay ziyaritining asan'gha toxtimaydighanliqi, keskin we jiddiy ötidighan söhbetlerde ziddiyetni hel qilidighan körünerlik netije chiqmasliqi mumkinlikini perez qilishmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.