Antoni bilinkén ton'gani ziyaret qilghanda xitayning yaman gherezlik herikitidin agahlandurghan

2023.07.26

Amérika tashqi ishlar ministiri antoni bilinkén polinéziye aral döliti ton'gani ziyaret qilghan künliride xitayning yaman gherezlik herikiti heqqide agahlandurush bergen.

Amérika dölet mejlisining axbarat tori bolghan “Töpilik” (The Hill) torida bérilgen xewerde éytilishiche, bilinkén ton'gada ziyarette boluwatqanda xitayning dunyada mesile peyda qilidighan qilmishliri heqqide toxtilip: “Biz körüwatqan bir ish shuki, xitayning mezkur rayondiki pa'aliyetlirining köpiyishi bilen teng mesile peyda qilidighan qilmishlirimu köpeymekte” dégen. Buninggha misal süpitide xitayning déngizchiliq ishliridiki qanunsiz qilmishliri, bashqa döletlerni talan-taraj qilish sheklidiki iqtisadiy pa'aliyetliri hemde u döletlerning hökümetlirini chirikleshtüridighan meblegh sélish heriketliri qatarliqlarni körsetken.

Buningdin ilgiri antoni bilinkén xitayni ziyaret qilip, xitay re'isi shi jinping bilen körüshken, amérika bilen xitay otturisidiki jiddiychilikni peseytmekchi bolghan bolsimu, kütkendek netijige érishelmigenidi.

Antoni bilinkénning bu qétimliq ton'ga ziyariti xitayning tinch okyan aral döletlirige kücheytiwatqan tesirini tizginlesh hemde amérika hökümitining bu rayon bilen bolghan munasiwitini mustehkemleshni meqset qilidiken. 7-Ayning 26-küni, antoni bilinkén ton'ga bash ministiri sowaléni bilen körüshüp, xitayning ton'gani qanchilik qerzge boghup qoyghanliqini sorighan, sowaléni xitayning qerzini qayturushqa bashlighanliqini, bu jehette héchqandaq mesile yoqluqini bildürgen hemde buningdin kéyin amérika bilen kilimat krizisi, ma'arip we dölet mudapi'esi jehette hemkarlishidighanliqini bildürgen.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.