Chén chu'en'go bingtu'enning herbiy xaraktérini kücheytish mesilisini özi biwasite tekitlidi
2018.12.06
Uyghur aptonom rayonluq partkomning sékrétari chén chu'en'go Uyghur élide turushluq ishlepchiqirish qurulush armiyesi yighinigha qatniship, bingtu'enning herbiy xaraktérini kücheytish mesilisini özi biwasite tekitligen.
Tengritagh torining bu heqtiki xewiridin qarighanda, chén chu'en'go 5-dékabir küni ürümchide bingtu'en rehberliri bilen uchrashqanda söz qilip, bingtu'enni Uyghur élining muqimliqi we menggülük eminlikini qolgha keltürüsh üchün shi jinping tapshurghan ghayet zor siyasiy wezipige qet'iy emel qilishni, partiye we hökümetning orunlashturushini sadiqliq bilen ijra qilishni tekitligen.
U, buning üchün “Bingtu'enning öz alahidilikini toluq jari qildurup, bingtu'enning herbiy xaraktérini kücheytish, herbiy maharet we herbiy istratégiye bilimliri igilishini tézlitip, shinjangning muqimliqi we menggülük eminliki üchün asas yaritilishi kérek” likini bildürgen.
Xitay hökümet da'iriliri yéqindin buyan toxtimay bingtu'enning herbiylik xaraktérini kücheytish mesilisini tekitlishi chet'ellerdiki Uyghur közetküchilerning küchlük diqqitini qozghimaqta.
Téxi mushu heptining béshida Uyghur aptonom rayonluq partkom we bingtu'en da'iriliri mexsus yighin chaqirghan. Shu yighindimu Uyghur aptonom rayonluq partkom mu'awin sékrétari, bingtu'enning partkom sékrétari sün jinglong, bingtu'enning merkez tapshurghan alahide istratégiyelik wezipini yaxshi orunlishi, buning üchün herbiylik xaraktérini kücheytip, herbiy iqtidarini östürüshi shert dep körsetken.
Uyghur közetküchiler xitay hökümitining Uyghur élide yüz bergen naraziliq heriketlirini dawamliq bingtu'enning küchi bilen basturup kéliwatqanliqini nezerde tutqanda, bingtu'enning herbiy iqtidarini ashurush mesilisining toxtimay tekitlinishi endishe qozghaydighan bir burulush, dep qarimaqta.