Chén chüen'go qeshqer ziyaritide "Ijtima'iy muqimliq" we "Namratliqini tügitish" ni tekitligen

Muxbirimiz irade
2020-04-23
Élxet
Pikir
Share
Print

Uyghur rayonida tajsiman wirus yuqumi qamali bikar qilin'ghandin kéyinla her derijilik xitay rehberlirining arqa-arqidin jenubiy Uyghur diyarigha, bolupmu qeshqerge ziyaretke bérishi diqqet qozghimaqta.

"Tengritagh" torining xewirige qarighanda, yéqinda Uyghur aptonom rayonluq partkomning sékrétari chén chüen'go "Yuqumning aldini élish, iqtisadiy we ijtima'iy tereqqiyatni ilgiri sürüsh" namida qeshqerge bérip xizmet tekshürüshide bolghan.

U ziyaritide "Xitay re'isi shi jinpingning yolyoruqlirini, jem'iyet muqimliqi we uzun muddetlik eminliktin ibaret omumiy nishan'gha yétish bilen birge namratliqtin qutulush nishanigha kapaletlik qilish" ni tekitligen.

Xitay hökümet taratquliri téxi bir qanche kün ilgiri, yeni 18-20-aprél künliri xitay kompartiyisi siyasiy byurosining ezasi, xitayning mu'awin bash ministiri, xitay dölet kabinéti "Namratlarni yölesh-ronaq tapquzush rehberlik guruppisi" ning bashliqi xu chünxu'aning Uyghur élining jenubida xizmet ziyaritide bolghanliqini we uning Uyghur rayonidiki namratliqtin qutuldurush xizmitige, bolupmu jenubiy Uyghur élide namratliqtin qutulush jéngide ghelibe qilishni nuqtiliq halda tekitligenlikini bayan qilghan idi.

Chet'ellerdiki közetküchilerning qarishiche, yuqiriqi ikki neper xitay emeldarning arqimu-arqidin qeshqerni ziyaret qilishi xitay hökümitining bundin kéyin Uyghur diyarining jenubigha yüzlinishni asasiy nishan qiliwatqanliqini körsitip béridiken. Bu nuqtidin qarighanda, xitay da'irilirining bundin kéyin Uyghur diyarining jenubini échishni tézlitip, yenimu köp xitay shirketliri we xitay köchmenlerni jenubqa orunlishishqa teshebbus qilidighanliqi mölcherlenmekte.

Toluq bet