Uyghur rayonida yene ikki neper kompartiye sékritari chiriklik qilmishi bilen jazalandi

Muxbirimiz ümidwar
2017-02-26
Share

Uyghur aptonom rayoni intizam tekshürüsh da'irilirining yéqinqi waqitlardin buyan xoten, ürümchi qatarliq jaylardiki bir qisim her derijilik Uyghur rehbiri kadirlar üstidin tekshürüsh we délo turghuzush élip barghanliqigha a'it uchurlar keng tarqilip, türlük inkaslarni qozghawatqanda, 25-féwral küni Uyghur aptonom rayonluq intizam tekshürüsh komitéti ikki neper yuqiri derijilik xitay kadirning chiriklik we intizamgha xilapliq qilish qilmishliri sewebidin, ular üstidin délo turghuzulup, edliye organlirining bir terep qilishigha tapshurulghanliqini jakarlidi.

"Shinjang uchur tori"ning bu heqtiki xewiride körsitilishiche, bularning biri turpan sheherlik siyasiy kéngeshning sabiq re'isi we partiye guruppa sékritari jang wénchyang bolup, uning"Teshkilning tekshürüshige qarshiliq qilghanliqi, teshkiliy intizamgha éghir xilapliq qilip, kadirlarni östürüsh-teyinlesh jeryanida bashqilargha nep yetküzgen hem bashqilarning pul-mélini qobul qilghanliq" qilmishliri körsitilgen.

Yene bir neper xitay kadir, Uyghur aptonom rayonluq gé'ologiye-qézilma bayliq charlash-échish idarisi partiye guruppisining sabiq mu'awin sékritari hem idare bashliqi zéng shyawgang bolup, uninggha chiriklik jinayiti artilghan, yeni uning xususiy aramgahlargha kirgenliki, hökümet puligha sayahet qilghanliqi, xizmitidin paydilinip, bashqilarning pul-mélini alghanliqi we ammining mülkini özining qiliwalghanliqi shuningdek "Binormal jinsiy alaqilerde bolghanliqi" qatarliq jinayetliri körsitilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet