Далай лама нәзәрбәнттики яш бәнчән ламаниң һазирқи әһвалини йәниму тәкшүрүшни тәләп қилған

“америка авази” ниң хәвиригә қариғанда, тибәтләрниң роһаний даһийси далай лама шәнбә күни баянат берип, хитай һөкүмити 20 йилдин буян нәзәрбәнттә тутуп туруватқан яш бәнчән ламаниң һазирқи әһвалини тәкшүрүп көрүшни тәләп қилған.

Мәлумки, өткән һәптә тибәт аптоном районлуқ партком бирликсәп бөлүминиң бир нәпәр әмәлдари туюқсизла баянат берип, 11-әвлад бәнчән ламаниң “нормал яшаватқанлиқи” вә “маарип тәрбийиси еливатқанлиқи” ни тилға алған илди.

Далай лама хитай даирилириниң нәзәрбәнттики бәнчән лама һәққидә бәргән баянатиға инкас билдүрүп, униң әһвалиниң зади қандақ икәнликини “йәниму тәкшүрүп көрүш зөрүр,” дегән.

1995-Йили тибәт буддизминиң роһаний даһийси далай лама әмдила 6 яшқа киргән нийимани 11-әвлад бәнчән ламалиққа тәйинлигәндин кейин, хитай һөкүмити уни өйидин тутуп кәткән. Шундин буян 20 йил өткән болсиму, хитай һөкүмити яш бәнчән лама һәққидә ташқи дуняға һечқандақ учур бәрмигән. У из-дерәксиз ғайиб болған йили хитай һөкүмити башқа бир тибәтлик балини “11-әвлад бәнчән лама” дәп елан қилған.