Amérika prézidénti barak obama b d t da irqiy we dini ayrimichiliqqa qarshi turushni tekitlidi

Muxbirimiz irade
2016-09-20
Share

Amérika prézidénti barak obama bügün birleshken döletler teshkilatining nyuyorktiki merkizide échilghan 71-qétimliq omumiy yighinida qilghan sözide irqchiliq, musapirlar mesilisi we kishilik hoquq qatarliq muhim mesililer üstide söz qildi.

U sözide yéqinqi künlerde süriyelik musapirlar mesilisi tüpeylidin küchiyip qalghan din we irqchiliq xahishi üstide alahide toxtilip, "Dunyani pütünleshken we tinch bir jay qilip shekillendürüsh yaki uni din we irqiy ayrimichiliqqa tolghan, bölün'gen bir halgha ekep qoyush hemmisi insanlarning qolida. Biz choqum aldimizgha qarap méngishimiz, kona tarixning tekrarlinishigha yol qoymasliqimiz kérek" dégen. We insanlarning dini, irqiy, millitige qarap perqliq mu'amile körmesliki kéreklikini agahlandurghan.

Amérika awazining xewer qilishiche, obama sözide yene bir qisim dölet hökümetlirining zhurnalistlarni cheklep, öktichilerni basturush heriketliriningmu hélihem mewjut bolup turuwatqanliqini, uchurning erkin éqishining chekliniwatqanliqini bayan qilip, pütün bu ehwallarning dunyani téximu tinchsiz bir jay haligha ekélishke hesse qoshidighanliqini eskertken.

U musapiler mesilisi üstidimu toxtilip, térrorchilar peyda qilghan aqiwetning bedilini gunahsiz musapirlar ötimesliki kéreklikini, ularning perqlendürülüshi kéreklikini éytip, herqaysi döletlerni musapirlar krizisini hel qilishta téximu aktip rol oynashqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet