27-Öktebir “Xelq'ara diniy erkinlik küni” de Uyghurlarning diniy erkinliki tekitlendi

Amérika prézidénti jow baydén 27-öktebir charshenbe küni “Xelq'ara diniy erkinlik küni” munasiwiti bilen élan qilghan yazma bayanatida, amérikaning dunya miqyasida diniy erkinlikning kapaletke ige bolushi üchün dawamliq heriket qilidighanliqini bildürgen. U diniy erkinlik mesilisini insaniyetning qimmet qarashlirini qoghdashla emes, belki dunyaning bixeterlikini qoghdashtiki muhim noqta, dep qaraydighanliqini tekitligen.

Amérika kéngesh palata ezasi marko rubiyo “Xelq'ara diniy erkinlik küni” munasiwiti bilen élan qilghan bayanatida, Uyghurlargha qaritiliwatqan diniy ziyankeshlikning toxtitilishini telep qilghan. U diniy erkinlikning herbir ademge bérilgen tebi'iy hoquq ikenlikini tekitligen bayanatida, özining bu künde barliq étiqadchilar bilen bir septe turidighanliqini, Uyghurlargha, tibetlerge qaritiliwatqan diniy ziyankeshlikning ayaqlishishi kéreklikini bildürgen.

Amérika tashqiy ishlar ministirliqi “Xelq'ara diniy erkinlik küni” munasiwiti bilen élan qilghan bayanatida, amérikaning diniy erkinlikni depsende qilghuchilarning jawabkarliqini sürüshte qilish arqiliq xelq'ara diniy erkinlikni ilgiri sürüshke tirishidighanliqini bayan qilghan.

“Washin'gton pochtisi” gézitining xewer qilishiche, 26-öktebir küni amérika tashqiy ishlar minsitirliqining diniy erkinlik alahide elchilikige namzat körsitilgen rashad hüseyinni bahalash ispat anglash yighini échilghan. Amérika kéngesh palatasi tashqiy ishlar komitétidiki yighinda namzat rashad hüseyin xitay bilen bolidighan diplomatik yaki iqtisadiy söhbetlerde diniy erkinlik mesililirining hergiz qurbanliq qilinmasliqigha kapaletlik qilidighanliqi toghrisida qesem bergen.

U Uyghurlar toghrisida kéngesh palata ezaliri sorighan so'aligha jawab bergende: “Xitay dunyadiki diniy erkinlikni eng éghir depsende qilghuchilarning biri” dégen. U yene Uyghurlargha, tibet buddistlirigha, xitay xiristiyanlirigha we falun'gung murtlirigha qiliniwatqan zulumni toxtitish üchün amérikaning xitaygha yenimu köp bésim qilishi kéreklikini bildürgen. U axirida yene xitayning Uyghurlargha qiliwatqan zulumini toxtitish üchün amérikaning musulman döletlerni heriketke keltürüshi kéreklikinimu eskertken.