Dölet amanliq xadimliri teripidin soraq qilin'ghan shöhret öz sergüzeshtlirini élan qilghan

Béyjingdiki xelq uniwérsitétining magistir oqughuchisi shöhret nijat bu yil 6-ayda xitay dölet amanliq saqchiliri teripidin ep kétilip, 28 sa'et soraq qilin'ghan idi.

Eyni chaghda uning uniwérsitéttiki yataqdishi Uyghur biz torigha ehwalni melum qilip, amanliq xadimlirining yataqqa kirip, shöhretni we uning kompyutérini ep ketkenlikini inkas qilghan idi. Bügün, shöhret nijat Uyghur biz torida özining 28 sa'et soraq qilinish jeryanining tepsilatini élan qilghan.

U maqaliside, özini soraq qilghan amanliq xadimliri ichide éli isimlik bir Uyghurning barliqini we ularning özidin Uyghur biz tori we bu torda ishleydighanlar heqqide so'allarni sorighanliqini, ularning özige tehdit qilghanliqini, qorqutqanliqini bildürgen. U shundaqla özining béyjing ayrodromida yoqap ketken mutellip iminning ehwalidinmu qattiq endishe qiliwatqanliqini éytqan.

Uyghurbiz torining béyjingdiki tor bashqurghuchisi shöhretning maqaliside bayan qilishiche yene, xitay dölet amanliqni qoghdighuchi xadimliri yene uningdin Uyghurbiz torining mexpiy shifirini telep qilghan we uning chet'ellerdiki muxbirlar bilen qandaq alaqisi barliqini sorighan.

Uyghurbiz tori béyjing milletler uniwérsitétining dotsénti ilham toxti ependi teripidin qurulghan. Yéqindin buyanqi xewerlerdin hazir xitay da'irilirining mezkur tor bet üstidiki teqipini kücheytkenliki melum bolmaqta.