Пирезидент доналд трамп вәзипигә олтурғандин кейин ши җинпиң билән сөзләшкәнликини ейтқан

Ройтерс агентлиқиниң 11-февралдики хәвиригә асасланғанда, америка пирезиденти доналд трамп өзиниң хитай дөләт рәиси ши җинпиң билән 20-январ вәзипигә олтурғандин кейин сөзләшкәнликини ейтқан. Әмма сөһбәт темиси тоғрисида тәпсилий учур бәрмигән.

Дүшәнбә күни, йәни 10-феврал фокс хәвәрлири қанили тирамптин униң америка пирезидентлиқ вәзиписигә олтурғандин буян хитай рәһбири ши җинпиң билән сөзләшкән сөзләшмигәнликини сориғанда, у мундақ дегән: “һәә… мән униң билән параңлаштим, мән униң хәлқи биләнму сөзләштим. Бизниң наһайити яхши шәхсий мунасивитимиз бар”.

 Пирезидент доналд трамп ши җинпиң билән қайси күни сөзләшкәнлики вә немиләрниң музакирә қилинғанлиқи тоғрисида тәпсилий учур бәрмигән.

Әмма, пирезидент доналд тирамп билән ши җинпиң 20-январ күни у вәзипигә олтуруштин бурунму бир қетим сөзлишип, тик-ток, сода вә тәйвән қатарлиқ мәсилиләрни музакирә қилған иди.

Пирезидент доналд трамп хитай маллириға 10 пирсәнт баҗ қоюп буни өткән һәптә рәсмий иҗра қилишиниң арқисидин, 9-феврал күни йәнә чәт әл полат-төмүр вә алюмин мәһсулатлириға 25 пирсәнт баҗ қойидиғанлиқини елан қилғаниди. Буму, хитайниң америкаға қаратқан полат-төмүр вә алюмин експортиға еғир зәрбә бериду дәп қаралмақта.

Пирезидент доналд трамп алдинқи һәптә, дунядики икки чоң иқтисадий гәвдә оттурисидики йеңи сода урушини пәсәйтишкә алдиримайдиғанлиқини ейтқаниди.

 Пирезидент доналд трамп билән ши җинпиң оттурисида болған бу қетимқи сөзлишиш американиң хитайға қаратқан таможна беҗини бошитиш яки кечиктүрүштә интайин муһим дәп қаралмақта.