BBC: «Америкилиқ мәслиһәтчи хитайниң дуня сода тәшкилатидин чиқириветилиши керәкликини ишарәт қилди

Мухбиримиз шөһрәт һошур
2018-11-21
Елхәт
Пикир
Share
Принт

Америкиниң сода вакаләтчилик ишханиси сәйшәнбә күни хитайниң тиҗарий иҗраатлири һәққидә бир доклат елан қилған. Доклатта хитай тәрәпниң сода ишлирида техника оғрилаш вә җасуслуқ қилиш қатарлиқ қанунсиз қилмишлирини йәнила давамлаштуруватқанлиқи оттуриға қоюлған.

Доклатта йәнә хитайниң нөвәттә чәтәл ширкәтлири билән шериклишиштики бир қисим орунсиз тәләплиридин ваз кәчкән вә буни омумлаштуруш үчүн бир қатар вәдиләрни бәргән болсиму, лекин хитайниң бу вәдилиригә ишинишкә болмайдиғанлиқи әскәртилгән. Доклатта йәнә мәзкур вакаләтчиликниң бу йил ахирида ечилидиған G-20 йиғиниға қәдәр хитайниң сода иҗраатлирида көзгә көрүнәрлик өзгириш пәйда қилиш үчүн күчәйдиғанлиқи тилға елинған.

Америка президенти доналд трамниң иқтисадий мәслиһәтчиләр кеңишиниң башлиқи кәйвен һассет әпәнди бүгүн BBC мухбири билән өткүзгән сөһбитидә америкиниң хитай үстидин дуня сода тәшкилатиға әрз сунса утидиғанлиқини, әмма әрз делосиниң бир тәрәп қилиниши үчүн 5-6 йил вақит кәткәчкә бу әрздә қазинилидиған пайдиниң зиянни қаплап болалмайдиғанлиқини әскәрткән. Шуңа у дуня сода тәшкилатиниң тәшкилат қаидисигә бойсунмайдиған вә иқтисадий җазаниң төвәнлики сәвәблик җазадин қорқмайдиған дөләтләргә қарита бир тәдбир қоллиниши керәкликини тәкитлигән.

BBC Ниң бүгүн бу һәқтә бәргән хәвиридә мәзкур мәслиһәтчиниң бу сөзлири «хитайни дуня сода тәшкилатидин чиқириветиш керәкликиниң бир ишарити» дейилмәктә.

Америка билән хитай арисидики сода уруши давам қиливатқан бу мәзгилдә икки тәрәпниң һәрбий саһәдики талаш-тартишлириму давам қилмақта. Америкиниң B-52 типлиқ икки айропилани игилик һоқуқи талаш-тартиштики җәнуби деңизға қонуп узун өтмәй, йәни чаршәнбә күни америкиниң бир авиаматкиси хоңкоң портида тохтиған. Америка деңиз армийә қоманданлиридин карл томас бүгүн мухбирларға қилған сөзидә хитай һәрбий парахотиниң бу йил 9‏-айда җәнуби деңизда өткүзгән хаталиқини йәнә тәкрарлимаслиқини үмид қилидиғанлиқини билдүргән.

Пикирләр (0)
Share
Толуқ бәт