Дуня уйғур қурултийиниң әнглийә сотиға сунған әрзи көрүлүшкә башлиған

Вашингтондин мухбиримиз ирадә тәйярлиди
2024.05.16

Икки йил бурун дуня уйғур қурултийи әнглийә һөкүмитиниң уйғур районидин пахта импорт қилиш мәсилисини тәкшүрмигәнликини билдүрүп әрз сунған, бирақ әйни чағда әнглийә соти һөкүмәткә пайдилиқ қарар чиқарған иди. Буниң билән, дуня уйғур қурултийи әнглийә сотиниң қарари үстидин қайта әрз сунған.

16-Май күни, дуня уйғур қурултийи, йәршари қанун һәрикәт тори (GLAN), қуллуққа қарши туруш хәлқара җәмийити қатарлиқлар әнглийә юқири сотиниң 2023-йили әнглийә һөкүмити үчүн чиқарған қарариға наразилиқ билдүргән.

Қуллуққа қарши туруш хәлқара җәмийити “X” тә билдүргән инкасида, бу сотни “дуня миқясида мәҗбурий әмгәккә селиниватқан милйонлиған кишиләрниң һаятиға тәсир көрситиши мумкин. Биз әнглийәниң мәҗбурий әмгәккә шерик болмаслиқиға капаләтлик қилишимиз керәк” дегән.

Юқиридики органниң инкасидин қариғанда, әнглийә соти илгирики қарарида “әгәр импорт қилғучи орун малларни базар қиммити бойичә сетивалған болса, у һалда у җинайи ишлар қануни бойичә җинайәт садир қилған һесабланмайду” дейиш арқилиқ, импорт қилғучини мәҗбурий әмгәк әйиблишидин қоғдиған икән.

Һалбуки, кишилик һоқуқ органлири болса мәҗбурий әмгәк билән ясалған таварларда адил баһа болмайдиғанлиқини илгири сүрүп, мәҗбурий әмгәк таварлириға базар қиммити бойичә муамилә қилишқа болмайдиғанлиқи, униң бирдәк чәклиниши лазимлиқини оттуриға қойған. Улар “әнглийә дәрһал мәҗбурий әмгәк мәһсулатлирини чәкләйдиған тәдбирни йолға қоймиса, америка вә явропа иттипақи базириға кирәлмигән мәҗбурий әмгәк мәһсулатлириниң төкмә қилип сетилиш орниға айлинип қалиду” дәп агаһландурған.

Мәлум болушичә, бу әрз һәққидики испат аңлаш йиғини икки күн давам қилидикән. Дуня уйғур қурултийиниң әнглийә ишханиси мудири рәһимә мәһмут ханим “X” тики сөзидә, “бу давада йеңип чиқиш әнглийәниң хитайниң уйғурларға қаритиватқан ирқий қирғинчилиқида рол алмайдиғанлиқи һәққидә күчлүк сигнал бериду” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.