Fréddiy lin rabiye qadir xanimni teywen'ge teklip qilidighanliqini élan qilghan

Muxbirimiz qutlan
2017-01-23
Élxet
Pikir
Share
Print

Teywen qanun chiqirish komitétining hey'et ezasi fréddiy lin dunya Uyghur qurultiyining re'isi rabiye qadir xanimni teywen'ge teklip qilidighanliqini élan qilghan.

Chet'ellerdiki xitay démokratchiliri chiqiriwatqan bowén torining bu heqtiki xewirige qarighanda, fréddiy lin yéngi nöwetlik amérika prézidénti donald trampning qesem bérip wezipe tapshuruwélishini tebriklesh munasiwiti bilen élip baridighan chet'el ziyariti dawamida rabiye qadir xanim bilen körüshidighanliqini bildürgen.

U sözide ilgiri rabiye xanimni teywenni ziyaret qilishqa teklip qilish ishini ma yingjyu hökümitining köp qétim ret qilip kelgenlikini, emma nöwette özlirining rabiye xanimni yene bir qétim teywen'ge teklip qilmaqchi boluwatqanliqini ilgiri sürgen.

Teywen ittipaqi birlikining bowén torigha bildürüshiche, ular 24-yanwar küni dunya Uyghur qurultiyi bilen birlikte "Asiya-tinch okyan musteqil küchler ittipaqining muxbirlarni kütüwélish yighini" uyushturidiken. Bu yighinda rabiye qadir xanimni teywen'ge teklip qilish mesilisi élan qilinidiken. Yaponiye Uyghur jem'iyitining re'isi ilham mehmutmu yighinqa qatniship, muxbirlarning bir qisim so'allirigha jawab béridiken.

Xewerde körsitilishiche, fréddiy lin rabiye xanimning teywenni ziyaret qilish ishining emelge éshishini arzu qiliwatqanliqini bildürgen.

Melum bolushiche, rabiye xanimning teywenni ziyaret qilish ishi ilgiri ma yingjyu hökümiti teripidin üch qétim ret qilin'ghan iken. Közetküchiler, xitay bilen teywen munasiwitining yéqindin buyan yiriklishishi, donald trampning "Bir junggo siyasiti" ge so'al tashlishi shundaqla sey yingwén hökümitining teywen musteqilliqini qaytidin küntertipke qoyushi seweblik rabiye qadir xanimning teywenni ziyaret qilishigha "Yéshil chiragh" yéqilishi mumkin, dégenlerni texmin qilmaqtiken.

Toluq bet