Amérika bash elchisi nikulas burns ekber es'etning qoyup bérilishini telep qilghan
2025.01.07
Amérikining xitayda turushluq bash elchisi nikulas burnis 1-ayning 4-küni ekber es'etning tughulghan küni munasiwiti bilen X da chaqiriq élan qilip, xitay hökümitidin uni shertsiz qoyup bérishni telep qilghan.
Chaqiriqta mundaq déyilgen: “Ekber es'et bügün özining 40 yashqa kirgen tughulghan künini shinjangdiki türmide ötküzmekte, u 8 yildin artuq waqittin béri türmide naheq qamilip yatmaqta. Men xitay kommunist hökümitini uni we uninggha oxshash xalighanche tutqun qilinip, naheq qamalghan kishilerni derhal hem shertsiz qoyup bérishke chaqirimen”.
Uningdin bashqa, amérika dölet mejlisi kéngesh palata ezasi kris wan hollén (Chris Van Hollen) mu X da yollighan uchurida ekber es'etning qoyup bérilishini telep qilip: “Ekber es'etning xitayda adaletsizlerche qamalghinigha 9 yilgha yéqin bolup qaldi, u peqet Uyghur bolghanliqi hem amérika tashqi ishlar ministirliqi pirogrammisigha qatnashqanliqi sewebidin zerbige uchridi. U emdi özining her bir künini, bolupmu tughulghan künini türmide yalghuz ötküzmesliki kérek, u choqum qoyup bérilishi kérek” dep yazghan.
Uyghur élidiki ijtima'iy alaqe tor bashqurghuchisi ekber es'et 2016-yili 2-ayda amérika tashqi ishlar ministirliqi teshkillep kéliwatqan “Xelq'ara ziyaretchilerni terbiyelesh rehberlik pirogrammisi” gha qatniship, ürümchige qaytip barghandin kéyin tutqun qilin'ghan bolup, 2020-yilning béshida 15 yilliq késiwétilgenliki ashkarilan'ghanidi.
Amérika tashqi ishlar ministirliqi, b d t kishilik hoquq organliri we bashqa teshkilatlar ekber es'et, gülshen abbas qatarliqlarning teqdirige izchil köngül bölüp kelmekte. 2023-Yil 4-ayda amérikaning xitayda turushluq bash elchisi nikolas burns ekber es'etning xitay da'iriliri teripidin tutqun qilin'ghanliqining 7 yilliqi munasiwiti bilen twittérda chaqiriq élan qilip, ekber es'et we bashqa mehbuslarni qoyup bérishni telep qilghanidi.