Чира наһийәси ешинча әмгәк күчлириниң йөткилишини 60миң адәм қетимға йәткүзүшни пилан қилған

Мухбиримиз үмидвар
2017-05-14
Елхәт
Пикир
Share
Принт

Уйғур райони даирлири 10-май күни мәхсус телевизийә йиғини чақирип, қәшқәр вә хотән вилайәтлиридики йеза ешинча әмгәк күчлиридин 100 миң адәмни үч йил ичидә тәшкиллик түрдә йөткәп ишқа орунлаштурушни тәкитлигән иди.

Әмма, йеза ешинча әмгәк күчлирини ичкири хитай өлкилиридки завут-фабрикиларға йөткәп апирип ишлитиш көп йиллардин буян изчил давамлишиватқанлиқи мәлум.Бирақ, хитай мәтбуатлири йеқиндин буян мәлум сандики йеза әмгәк күчлирини уйғур райони ичидики бәзи завутларға орунлаштурушқа башлиғанлиқини хәвәр қилмақта.

Бу йил ичидә хотән вилайитиниң чира наһийәсидин йөткәп ишқа орунлаштурулғанларниң сани 28 миң адәм қетимдин ашқан болуп, «тәңритағ тори»ниң хәвиридин ашкарилинишичә, чира наһийәси бу йил йөткәп ишқа орунлаштурилидиған йеза артуқ әмгәк күчлириниң санини 60 миң адәм қетимға йәткүзүшни план қилған. Анализчиларниң қаришичә, әмәлийәттә чира наһийәсиниң аһалиси 130 миң әтрапида болуп, чира наһийәсиниң мәзкур пилани бу наһийәдики артуқ әмгәк күчиниң көплүкини көрситидикән.

Хәвәрдин мәлум болушичә, йеқинда чира наһийәсниң һәрқайси йеза-базарлиридин кәлгән 200 артуқ әмгәкчини хитай нефит гуруһи тарим нефитлики ширкитиниң поскам базисиға йөткәп ишқа орунлаштурулған. Бирақ, мәзкур әмгәк күчлириниң мааш,тәминат вә башқа параванлиқ капаләтлириниң бу нефитликтики ишчилар вә кадирлар билән болған пәрқи һәққидә учур йоқ. Лекин мәзкур «артуқ әмгәк күчлири» сәпәргә атлиниш алдидики мурасимда хитай дөләт байриқиға қарап,:«дөләт қануни вә низамлириға қәтий риайә қилимән!», «вәтәнниң бирликини, милләтләр иттипақлиқини қәтий қоғдаймән!», «әмгәк шәрәплик, һалал әмгәк билән бейиймиз!» дәп қәсәм бәргән.

«Шинҗаң гезити»ниң мақалисидә йеза ешинча әмгәк күчлирини йөткәп орунлаштуруш «сиясий вәзипә» дәп баһаланған иди.

Пикирләр (0)
Share
Толуқ бәт