Түркийә президенти әрдоған америка зияритини башлиди

Мухбиримиз меһрибан
2017.05.16

Түркийә президенти әрдоған 16-май күни америка зияритини башлиди. Хәвәрләрдин мәлум болушичә 16-май чүштин кейин америкиниң йеңи нөвәтлик президенти доналд трамп ақсарайда түркийә президенти әрдоғанни күтүвалған, вә икки дөләт башлиқи бирләшмә баянат елан қилған.

Америкиниң с н н телевизийәси вә америка авази радиоси қатарлиқларниң хәвәрлиридә америка президенти доналд трамп баянатида америка билән түркийәниң узун йиллиқ достлуқ һәмкарлиқи һәққидә тохтилип, “бизниң наһайити яхши бир достлуқ һәмкарлиқимиз бар, биз бу хил мунасивәтни техиму яхшилашқа тиришимиз.Шуңа биз күчлүк вә мустәһкәм музакириләрдә болимиз” дегән сөзлири нәқил елинған вә түркийәниң 1950-йиллардики корейә урушиға америкини қоллап әскәр әвәткәнлики әслитип өтүлди.

Хәвәрләрдә йәнә түркийә президенти әрдоғанниң америка зияритидин илгири икки дөләт мунасивити һәққидә тохтилип ейтқан сөзидики “бу қетимқи америка зиярити түркийә-америка мунасивитидики йеңи йүксилишкә йол ачиду” дегән сөзлири нәқил елинған. Түркийә президенти әрдоғанниң бу нөвәтлик америка зияритидики мәқсити қизиқиш қозғаватқанда, хәлқара таратқуларда йәнә президент әрдоғанниң америкиниң йеңи нөвәтлик президенти доналд трамп билән болған сөһбитидә түркийә-америка мунасивитини илгири сүрүштә оттуриға қойған тәләплириму диққәт нуқтиси болди.

“вашингтон игзәминер” йәни “вашингтон тәкшүргүчиси” гезити, америка авази қатарлиқларниң хәвәрлиридә йәнә түркийә президенти әрдоғаннниң “биз сүрийәдики ислам дөлити һөкүмранлиқи районлирида америкиниң курд қораллиқ күчлири йәни ‛курд хәлқ қоғдиғучи әтриди‚ YPG ни қорал билән тәминлишигә қошулмаймиз” дегән сөзлириму нәқил елинип, түркийә президенти әрдоғанниң бу қетимқи америка зияритиниң өткән һәптә америка президенти доналд трамп сүрийәдики курд қораллиқ күчлирини қорал билән тәминләшкә қошулғанлиқи сәвәбидин түркийә һөкүмити қаттиқ наразилиқ билдүрүп бир һәптидин кейинки мәзгилгә тоғра кәлгәнлики алаһидә әскәртилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.