Америка федератсийә тәкшүрүш идариси хитайниң америкадики уйғурларға паракәндичилик селиватқанлиқини агаһландурған

Мухбиримиз әркин
2021-09-03
Share

Америка федератсийә тәкшүрүш идариси (FBI) хитай даирилириниң америкадики уйғурларни һәм шәхс һәм рәқәмлик техникиларни ишлитип қорқитиватқанлиқи вә паракәндичилик селиватқанлиқини агаһландурған. “яху хәвәрлири” ниң ашкарилишичә, федератсийә тәкшүрүш идариси бу агаһландурушни өзиниң йеқинда тарқатқан доклатида әскәрткән.

Доклатта: “түзүмгә хилап бу тәһдитләрниң америкада турушлуқ шәхсләрниң хитайдики аилиси яки достлирини тутқун қилиш, хитайдики мал-мүлкини тартивелиш, рәқәмлик яки шәхсләр билән паракәндичилик селиш, мәҗбурий қайтуруп кетишкә урунуш, компютерни хаккерлаш, рәқәмлик һуҗум қилиш, торда ялған вакаләтлик қилиш қатарлиқни өз ичигә алидиғанлиқи” тәкитләнгән.

Доклатта, буниңға аит төт вәқә мисал кәлтүрүлгән болуп, бу әркин асия радиоси уйғур бөлүми мухбирлириниң аилә әзалиридин өч елиш вәқәлириниму өз ичигә алған. Доклатта йәнә хитай даирилириниң 2019-йилидин 2021-йили 3-айғичә үндидар арқилиқ америкадики бир уйғур аялға уйғурларниң кәмситишкә учраватқанлиқини ашкара тилға алмаслиқ тоғрисида текист вә авазлиқ тәлқиндә болғанлиқи, кейинрәк бу аялиниң аилә әзалириниң лагерға елип кетилгәнлики көрситилгән.

Доклатта бу уйғур аялниң исми тилға илимиған болсиму, бирақ америкада турушлуқ қәлбинур ғени радийиомизда корлидики хитай әмәлдарлириниң униң билән сөзлишип, аилисигә тәһдит салғанлиқини ашкарилиғаниди. FBI Ниң доклатида йәнә “америка һөкүмити хитай әмәлдарлирини җазалиған вә өткән йили хитайниң шинҗаңдики кишилик һоқуқ, демократийә дәпсәндичиликигә қарши аммиви вә дипломатик бесимини күчәйткән болсиму, бирақ хитай һөкүмити бу һәрикитини давамлаштуруватиду……. Униң чегра һалқиған бастуруш һәрикити америка қанунлири вә шәхсләрниң һоқуқиға хилаплиқ қилмақта” дейилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт