Әркин асия радиоси уйғур бөлүми ишлигән «ғәрб дунясидики уйғурлар» намлиқ йүрүшлүк тәкшүрүш программиси баш оргини нюйорк шәһиридики MIN ахбарат гуруһиниң 2017- йиллиқ «әң надир тор әсири мукапати» ға еришти.
«Ғәрб дунясидики уйғурлар» намлиқ йүрүшлүк программа 12 қисимдин тәркиб тапқан болуп, программиниң һәр бир қисми икки бөлүмгә бөлүнгән. Программа 2016 - йили февралдин буян һәр айда бир қисимдин бу йилниң бешиғичә аңлитилған вә шуниңға асасән программиниң инглизчә нусхиси һазирланған иди.
Мәзкур программида 1950 - йиллиридин башлап ана юртлирини һәрхил сәвәбләр билән тәрк етишкә мәҗбур болуп, дуняниң һәр қайси җайлирида яшаватқан уйғурларниң нөвәттики миллий, мәдәний вә сиясий һаятиға қарап чиқилған.
Программида йәнә ғәрб дунясидики уйғурлар дуч келиватқан кимлик кризиси билән йәрлик мәдәнийәткә арилишиш мәсилиси оттурисидики давалғуш һәр қайси дөләтләрдә турушлуқ уйғур вә мунасивәтлик йәрлик мутәхәссисләрниң баянлири арқилиқ ярқин йорутулған.
Бу программини радийомиз мухбири қутлан тәйярлиған болуп, у, бу программа башлиништин илгири түркийә вә германийә қатарлиқ явропа әллиридә бир айлиқ тәкшүрүш елип барған иди.
Мәзкур программа илгири йәнә әң яхши кишилик һоқуқ мукапатиғиму еришкән.
MIN Ахбарат ширкити надир әсәрләр мукапатини һәр йили бир қетим тарқитиду. Уйғур бөлүм директори алим сейитофниң қаришичә, MIN ахбарат ширкитиниң баһалаш өлчәмлириму интайин юқири болуп, уйғур бөлүми программилириниң мәзкур мукапатқа наил болуши һәммәйләнгә шәрәп елип келидикән.
Уйғур бөлүми елан қилған әсәрләр нюйорк хәлқара ахбарат фестивалидиму зәпәр қучқан иди.
