Америка ташқий ишлар министирлиқи хитай һөкүмитиниң гүлшән аббасни қоюп бериши тоғрилиқ чақириқ елан қилған

Мухбиримиз ирадә
2023.05.19

Америка ташқий ишлар министирлиқи хитай һөкүмитиниң нөвәттә хитай түрмисидә тутуп турулуватқан гүлшән аббасни дәрһал қоюп бериш тоғрилиқ чақириқ елан қилған.

Америка ташқий ишлар министирлиқи тивиттер арқилиқ елан қилған чақириқида мундақ дегән: “гүлшән аббас ишәнчлик болмиған пакитлар асасида әйиблинип хитайда 20 йиллиқ қамақ җазасиға һөкүм қилинған. Биз хитай хәлқ җумһурийитиниң инсанпәрвәрлик мәвқәсидә туруп, уни қоюп беришини тәләп қилимиз. У шундила аилисидикиләр билән җәм болалайду вә давалиниш имканийитигә еришәләйду.”

Америкадики уйғур һәрикити тәшкилатиниң рәиси рошән аббас ханимниң һәдиси гүлшән аббасниң 2018-йили тутқун қилинип, 2020-йили 20 йиллиқ кесилгәнлики мәлум болған иди.

Игилинишичә, хитай һөкүмити гүлшән аббасниң делосидиму башқа миңлиған уйғур тутқунларниң делолириға охшашла қануний тәртип, очуқ-ашкара сот вә өзини ақлаш һәқ-һоқуқлириға әмәл қилмиған.

Б д т кишилик һоқуқ кеңишиниң халиғанчә тутқунға қарши туруш хизмәт гурупписиму өткән һәптә елан қилған тәкшүрүш доклатида, хитай һөкүмити тәрипидин тутқун қилинғандин бери из-дерики болмиған уйғурлардин атақлиқ журналист қурбан мамут, “бағдаш” ториниң қурғучиси әкбәр әсәт вә дохтур гүлшән аббасниң дәрһал һәм шәртсиз қоюп берилишини алаһидә тәләп қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.