Хотән шәһәрлик даириләр 1-февралдин етибарән һәрқандақ шәкилдики һашарни бикар қилидиғанлиқини қарар қилған

Мухбиримиз қутлан
2017-02-04
Елхәт
Пикир
Share
Принт


Игилинишичә, хотән шәһәрлик даириләр мәхсус қарар елан қилип, бу йил 1-февралдин етибарән һәрқандақ шәкилдики һәқсиз әмгәкни әмәлдин қалдуридиғанлиқини билдүргән.

Хотән шәһәрлик һөкүмәт ториға чапланған бу қарарда буниңдин кейин хотән шәһири миқясидики барлиқ йеза-базар вә кәнтләрдики һашар характерини алған һәқсиз әмгәкләрниң бирдәк бикар қилинидиғанлиқи қәйт қилинған.

Мәзкур қарарда мундақ дейилгән: «иҗтимаий муқимлиқ вә әбәдий әминликтин ибарәт баш нишанни зич чөридәп, деһқанлар аммисиниң йүкини мәнбәсидин йәңгилитиш, асасий қатламлардики зиддийәтләрни пәсәйтиш вә йеза-кәнт кадирлириниң истилини яхшилаш үчүн шәһәрлик партком вә хәлқ һөкүмити бүгүндин башлап, шәһәр миқясида һәрқандақ шәкилдики һәқсиз әмгәкни әмәлдин қалдурушни қарар қилди.»

Мәзкур қарарда йәнә хотәндики һәр дәриҗилик партийә тәшкилатлириниң секритарлири бу қарарни иҗра қилиштики биринчи мәсул киши, дәп бекитилгән.

Мәлумки, хотән вилайити уйғур аптоном райони бойичә йәрлик уйғур деһқанлириниң зиммисидики һашар селиқи әң еғир район болуп, бундақ һәқсиз әмгәкниң вақти һәтта бирқанчә айғичә созулидикән.

Көзәткүчиләр, хитайниң һечқандақ өлкә вә аптоном районлирида мәвҗут болмиған һашар әмгикиниң пәқәтла уйғур дияриниң җәнубидики вилайәтләрдә йилларчә давамлишип кәлгәнликини, нөвәттә асасий қатламдики қаршилиқ һәрикәтлириниң йәрлик даириләрни бу қарарни елишқа мәҗбур қилғанлиқини тәкитлимәктә.

Пикирләр (0)
Share
Толуқ бәт