Ички моңғул шилинғул аймиқида наразилиқ билдүргән моңғуллар тутқун қилинди

Мухбиримиз меһрибан
2015-09-08
Елхәт
Пикир
Share
Принт


6 - Сентәбир йәкшәнбә күни ички моңғулниң шилинғул аймиқида һөкүмәткә наразилиқ билдүргән моңғул чарвичилири тутқун қилинди. Радийомиз игилигән әһваллардин мәлум болушичә, моңғулларниң наразилиқ һәрикити сәйшәнбә күниму давамлишиватқан болуп, бүгүн 100 дин артуқ моңғул наһийилик һөкүмәт алдида җим олтурувелип наразилиқ билдүрүргән вә һөкүмәттин тутқун қилинғанларни қоюп беришни тәләп қилған.

Чәтәлләрдики моңғул тәшкилатлиридин японийидики җәнубий моңғолийә хәлқ партийисиниң катиби кәрид квасгалт әпәндиниң билдүрүшичә, тутқун қилиниш вәқәси 6 - сентәбир йәкшәнбә күни ички моңғулниң шилонғул аймиқи шулунсаха хошутида йүз бәргән. Униң билдүрүшичә, бу йил йеғин аз болғини үчүн шилинғул яйлиқида язичә қаттиқ қурғақчилиқ болған. яйлақтики су мәнбәлири вә тағдики музлуқлар хитай ширкәтлири тәрипидин игиливелинғанлиқи үчүн, яйлақтики от - чөпләр қуруп, мал - чарва вә моңғул чарвичилириниң ичимлик су мәсилисиму қийинлашқан. Бу әһвалдин нарази болған бирнәччә йүз моңғул йәкшәнбә күни яйлақтики от - чөпләрниң қуруп кетишигә сәвәбчи болған хитай ширкәтлири үстидин әрз қилиш вә су қислиқи мәсилисини һәл қилишни тәләп қилип, шилинғул аймиқи йәни наһийилик һөкүмәткә барғинида сақчилар тәрипидин тутқун қилинған. Кәрид әпәнди улар игилигән мәлуматта сәйшәнбә күнигә қәдәр 30 дин артуқ кишиниң тутқун қилинғанлиқини билдүрди.

Пикирләр (0)
Share
Толуқ бәт