Хотәндә йәнә 573 киши “икки йүзлимичилик” кә четилған

Хотән вилайити йеқинда йәнә уқтуруш чиқирип, 573 нәпәр асасий қатлам кадирини “икки йүзлимичиликкә четишлиқ,” дәп елан қилған.

“хотән гезити” ниң хотән вилайәтлик интизам тәкшүрүш комитетиниң қарарини мәнбә көрситип тарқатқан хәвиридин мәлум болушичә, хотән вилайити йеқинда икки биваситә қарашлиқ орган, 25 йеза-базар вә 17 кәнттики “икки йүзлимичи” кадирларни вә “икки йүзлимичилик” қилғанларни байқаш бойичә үчинчи қетимлиқ “тәкшүрүш” елип барғанлиқи мәлум.

Тәкшүрүш җәрянида 573 нәпәр кишигә мунасивәтлик мәсилә байқалған, 31 кишигә дело турғузулған, 25 кишигә партийә ичидә агаһландуруш җазаси берилгән. Чәтәлләрдики уйғур көзәткүчиләр, бу кадирларниң қалғанлириниң “йепиқ тәрбийәләш мәркәзлири” гә әвәтилгән болуши мумкинликини пәрәз қилмақта.

Хәвәрдә ейтилишичә, хотән даирилири “хотән вилайитиниң көзитиш хизмитини йолға қоюш чариси” вә “хотән вилайитиниң 2017-йилидин 2021-йилиғичә болған көзитиш хизмәтлири өлчими” қатарлиқ түзүмләргә асасән “икки йүзлимичи” ләргә қарши турушни йәниму күчәйтиш үчүн төтинчи қетимлиқ көзитиш хизмитини башлиған икән.

Уйғур аптоном районлуқ даириләр өткән йилдин буян уйғур елида, болупму асасий қатламда аталмиш “икки йүзлимичи” ләрни тазилаш күриши елип берип, нурғун уйғур кадирларни җазалиған, бәзилирини һәтта әдлийә орунлириға тапшуруп бәргән иди. Радийомиз игилигән учурларда һәрқайси вилайәт вә шәһәрләрдә шиддәт билән кеңәйтиливатқан “йепиқ тәрбийәләш мәркәзлири” гә йиғивелинған уйғур кадирларниң мутләқ көп қисминиң охшаш болмиған дәриҗидә “икки йүзлимичилик” қилмишиға четилип қалғанлар икәнлики айдиңлашқан иди. юқиридики 2021-йилиғичә елан қилинған чаридин бу хизмәтниң йәнә давамлишидиғанлиқи мәлум болмақта.