Ilham toxti da'irilerning Uyghur oqughuchilarning türkiyege qaytip oqushigha tosqunluq qiliwatqanliqini eyiblidi

Béyjing merkizi milletler uniwérsitétining dotsénti, Uyghur ziyaliysi ilham toxti, bügün radi'omiz Uyghur bölümining ziyaritini qobul qilip, da'irilerning uninggha qaratqan uzun muddetlik nezerbendige naraziliqini bildürüsh bilen bille, nöwette tetil qilip yurtigha qaytqan bir qisim Uyghur oqughuchilarning türkiyege qaytip oqushini dawamlashturushi yerlik da'iriler teripidin tosalghugha uchrawatqanliqini eyiblidi.

Ilham toxti ependining bildürüshiche, béyjing dölet amanliqini qoghdash xadimliri uninggha qaratqan uzun muddetlik nazaret we teqib qilishni dawamliq kücheytiwatqan bolup, tünügündin buyan uni nazaret qiliwatqan dölet amanliqini qoghdighuchi xadimlar uninggha hetta öz öyidin chiqip, mektep hoylisida aylinishiningmu cheklen'genlikini uqturghan.

Ilham toxti ependi yene, 15-iyul küni türkiyege qaytish sepiride béyjing ayrodromida ghayib bolghan oqughuchi mutellip imin heqqide hazirghiche xewer yoqluqini ilgiri sürüp, özining yéqinda tetil qilip yurtigha qaytqan yene bir oqughuchiningmu, da'iriler teripidin tosqunluqqa uchrap, türkiyege qaytip oqushni dawamlashturushqa amalsiz qéliwatqanliqi heqqide xewer tapqanliqini bildürüp, da'irilerning chet'elde oquwatqan Uyghur oqughuchilargha herxil cheklimilerni qoyuwatqanliqini eyiblidi.