Вал-ситрит жорнили сахаров мукапатиниң илһам тохтиға берилишини «уйғурларниң ғәлибиси» дәп алқишлиди

Мухбиримиз ирадә
2019-10-29
Елхәт
Пикир
Share
Принт

Америкадики нопузлуқ жорналлардин «вал-ситрит» жорнили 25-өктәбир күни «уйғурларниң ғәлибиси» мавзулуқ тәһрират мақалииси елан қилип, яврупа парламентиниң бу йиллиқ сахаров мукапатини уйғур зиялийси илһам тохтиға бәргәнликини алқишлиди.

Мәзкур жорнал тәһрират мақалисидә, уйғурларға баравәрлик вә өз ғорури вә ирадиси бойичә яшаш һоқуқи тәләп қилған илһам тохтини хитай һөкүмитиниң «террорчи» дәп әйиблигәнлики тилға елинп «мана бу илһам тохтиниң бу мукапатқа толиму лайиқ икәнликини испатлайду» дейилгән. Мақалидә илһам тохтиниң нөвәттә уйғур елидики йиғивелиш лагерлирида қамилип ятқан бир йерим милйон әтрапидики уйғурниң бири икәнлики әскәртилгән. Мақалидә мунулар баян қилинған: 

«яврупа парламенти бу қарари арқилиқ дуняниң диққитини уйғуларға қилиниватқан шиддәтлик зораванлиққа буриди. Америка ташқи ишлар министири майк помпейо бу зораванлиқниң 1930‏-йилларни әслитидиғанлиқини билдүрди. Америка һөкүмити бу ишта мәсулийити бар хитай әмәлдарлириға җаза тәдбирлири қоюш арқилиқ уйғурлар үчүн җиддий һәрикәткә өтүшкә башлиди. яврупаниңму бу сәпкә қошулуватқинини көрүш бизни хурсән қилди».

28-Өктәбир күни йәнә, хәлқара кишилик һоқуқни көзитиш тәшкилати баянат елан қилип, яврупа парламентини илһам тохтиға берилгән «сахаров мукапати» ни хитай һөкүмитигә бесим ишлитидиған қоралға айландурушқа чақирди. 

Мәзкур орган 28-өктәбир күни яврупа парламенти рәһбәрлиригә мәктуб йоллап, яврупа парламентини бу йил түрмидики уйғур зиялийси илһам тохтиға берилгән «сахаров мукапати» арқилиқ илһам тохтиниң қоюп берилиши үчүн хитайға күчлук йосунда бесим ишлитишкә дәвәт қилған. 

Улар йәнә, яврупа парламентидин яврупа иттипақиға қарашлиқ органлар, һөкүмәтләр вә һәрқайси дөләтлик парламентлар билән йеқиндин һәмкарлишип, бирләшкән дөләтләр тәшкилатиниң уйғур районида мустәқил тәкшүрүш елип беришини қолға кәлтүрүшни тәләп қилған. 

Явропа парламенти президенти дәйвид сассоли 24‏-өктәбир күни бу йиллиқ «сахароф мукапати» ниң 2014‏-йили хитай һөкүмити тәрипидин қолға елинип, муддәтсиз қамаққа һөкүм қилинған илһам тохтиға берилгәнликини җакарлиған иди.

Пикирләр (0)
Share
Толуқ бәт