Intel Ширкитиниң уйғур мәҗбурий әмгики һәққидики баянати хитай тор мунбәрлиригә “от йеқивәткән”

Мухбиримиз әзиз
2021-12-22
Share

Компютер өзәк (chip) лирини ясаш билән дуняға тонулған Intel ширкити йеқинда өзиниң хитайдики мал тәминләш зәнҗиригә четишлиқ саһәләрниң мәҗбурий әмгәк мәсилисигә алаһидә диққәт қилишини җекиләп баянат елан қилған иди. Мәзкур баянатта улар уйғур дияридики мәҗбурий әмгәк мәсилисини тилға елип, мал тәминлигүчиләрдин “һәрқандақ әһвалда бу хилдики мәҗбурий әмгәк қилмишиға четилип қалмаслиқ” ни тәләп қилған.

Intel Ширкитиниң мәзкур баянати хитайдики “вейбо” мунбиридә бирнәччә хил тилда, җүмлидин хитайчә елан қилинғандин кейин, нәччә йүз милйон хитай буниңға тушму-туштин һуҗум қозғиған. “бломберг хәвәрлири” ниң 22-декабирдики хәвиридә ейтилишичә, хитай милләтчилириниң тор бекәтлиридин болған “гуәнча” қатарлиқлар “Intel ширкити ғәрb җаһангирликиниң мәйданини яқлап, бизниң мәһсулатлиримизға қара сүркәватиду” дегән.

Intel Ширкити буниңдин илгириму бирнәччә қетим баянат елан қилип, өзлири ишләпчиқарған мәһсулатларниң һечқачан уйғур мәҗбурий әмгикигә четилмиғанлиқини җакарлиған иди. Әмма уларниң бу қетимқи баянати елан қилинғандин кейин, хитай тор дуняси буниңға қаттиқ һуҗум қилған. Бу хилдики һуҗумлар Nike ширкитиниң мушу мәзмундики баянати елан қилинғандиму бир қетим көрүлгән болуп, буниңға һәрқачан милләтчилик мәзмунидики чуқанлар арилишип кәткән. Хитай һөкүмити башқурушидики “йәр шари вақти” гезитиниң сабиқ баш муһәррири, хитай милләтчиликиниң “пешиваси” дәп қариливатқан ху шиҗин бу һәқтә сөз қилип: “Intel ширкитигә охшаш ширкәтләрниң қилғанлирини һәргизму унтумаймиз. Дөлитимиз қудрәт тапқансери улардин һесап елишимиз техиму асанға чүшиду,” дегән.

Мәлум болушичә, Intel ширкитиниң әң чоң сода базири хитай болуп, өткән бәш йилдин буян улар мушу базар арқилиқ ғайәт зор пайда тапқан икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт