Intel Shirkitining Uyghur mejburiy emgiki heqqidiki bayanati xitay tor munberlirige “Ot yéqiwetken”

Muxbirimiz eziz
2021-12-22
Share

Kompyutér özek (chip) lirini yasash bilen dunyagha tonulghan Intel shirkiti yéqinda özining xitaydiki mal teminlesh zenjirige chétishliq sahelerning mejburiy emgek mesilisige alahide diqqet qilishini jékilep bayanat élan qilghan idi. Mezkur bayanatta ular Uyghur diyaridiki mejburiy emgek mesilisini tilgha élip, mal teminligüchilerdin “Herqandaq ehwalda bu xildiki mejburiy emgek qilmishigha chétilip qalmasliq” ni telep qilghan.

Intel Shirkitining mezkur bayanati xitaydiki “Wéybo” munbiride birnechche xil tilda, jümlidin xitayche élan qilin'ghandin kéyin, nechche yüz milyon xitay buninggha tushmu-tushtin hujum qozghighan. “Blombérg xewerliri” ning 22-dékabirdiki xewiride éytilishiche, xitay milletchilirining tor béketliridin bolghan “Gu'encha” qatarliqlar “Intel Shirkiti gherb jahan'girlikining meydanini yaqlap, bizning mehsulatlirimizgha qara sürkewatidu” dégen.

Intel Shirkiti buningdin ilgirimu birnechche qétim bayanat élan qilip, özliri ishlepchiqarghan mehsulatlarning héchqachan Uyghur mejburiy emgikige chétilmighanliqini jakarlighan idi. Emma ularning bu qétimqi bayanati élan qilin'ghandin kéyin, xitay tor dunyasi buninggha qattiq hujum qilghan. Bu xildiki hujumlar Nike shirkitining mushu mezmundiki bayanati élan qilin'ghandimu bir qétim körülgen bolup, buninggha herqachan milletchilik mezmunidiki chuqanlar ariliship ketken. Xitay hökümiti bashqurushidiki “Yer shari waqti” gézitining sabiq bash muherriri, xitay milletchilikining “Péshiwasi” dep qariliwatqan xu shijin bu heqte söz qilip: “Intel Shirkitige oxshash shirketlerning qilghanlirini hergizmu untumaymiz. Dölitimiz qudret tapqanséri ulardin hésap élishimiz téximu asan'gha chüshidu,” dégen.

Melum bolushiche, Intel shirkitining eng chong soda baziri xitay bolup, ötken besh yildin buyan ular mushu bazar arqiliq ghayet zor payda tapqan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet