Блинкен хитайниң уйғурларға йүргүзгән "ирқий қирғинчилиқи" ға "қәтий қарши туридиғанлиқи" ни билдүргән

Мухбиримиз әркин
2021-04-12
Share

Америка ташқий ишлар министири антони блинкен хитайниң уйғурларға йүргүзгән "ирқий қирғинчилиқи" ни йәнә бир қетим қаттиқ әйибләп, американиң хитайниң бу хил "қорқунчлуқ" кишилик һоқуқ дәпсәндичиликигә "қәтий қарши туридиғанлиқи" ни билдүргән. Блинкен йәнә америка ширкәтлирини уйғур райони билән сода алақиси қилмаслиққа чақирип, сода алақисидә болған бир қисим ширкәтләрниң мәҗбурий әмгәк билән болған мунасивити сәвәблик әйибләшкә учраватқанлиқини тәкитлигән.

Блинкен бу сөзләрни 11-април йәкшәнбә күни америка NBC телевизийә қанилиниң "ахбарат билән учришиш" һәптилик программисиниң зияритини қобул қилғанда билдүргән. Блинкен сөзидә йәнә американи өз ичигә алған дунядики һәр қайси һөкүмәтләрни "конкирет һәрикәт" қоллинип, ширкәтләрниң хитайға уйғурларни бастуридиған мәһсулат яки мулазимәт билән тәминлимәсликкә капаләтлик қилишқа чақирған.

У мундақ дегән: "биз бир қанчә ишни қилалишимиз керәк. Биз дуняни бир йәргә җәм қилип, йүз бәргән вә давамлиқ йүз бериватқан ишларни бирдәк авазда әйиблийәлишимиз лазим. Биз әмәлий һәрикәт қоллинишқимиз, мәсилән, һечқандақ бир ширкитимизниң хитайға пуқраларни, җүмлидин уйғур аһалисини бастуридиған нәрсиләр билән тәминлимәсликигә һөддә қилишимиз керәк."

Блинкенниң ейтишичә, америка бейҗиң қишлиқ олимпикини байқут қилиш-қилмаслиққа техи қарар бәрмигән. У олимпикқа йәнә бир йилдәк вақит барлиқи, һазир диққитини нуқтилиқ һалда иттипақдашлири билән мәслиһәтлишиш, уларниң пикирини елиш вә әндишилирини аңлашқа қаратқанлиқи, һазир бир қарарға келишниң балдурлуқ қилидиғанлиқини билдүгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт