Xitay hökümiti Uyghur rayonida sayahetchilikni zor küch bilen tereqqiy qildurush yighini chaqirghan

Xitay hökümiti Uyghur rayonida sayahetchilikni zor küch bilen tereqqiy qildurush yighini chaqirghan

“Irqiy qirghinchiliq we insaniyetke qarshi jinayet ötküzüsh” jinayiti bilen eyiblinip kéliwatqan xitayning yéqinqi mezgildin buyan Uyghur rayonidiki qebih jinayetlirini yoshurush we “Shinjang yaxshi jay” teshwiqatini qanat yaydurush üchün sayahetchilikni küchep tereqqiy qilduruwatqanliqi melum.

Xitayning “Tengritagh tori”, “Shinjang géziti” torining xewer qilishiche, Uyghur aptonom rayonluq hökümet27-may küni turpanda “2024-Yilliq aptonom rayon sayahetchilikini tereqqiy qildurush chong yighini” chaqirghan, yighin'gha xitayning ichi we sirtidin bolup 500 adem qatnashqan. Yighinda aptonom rayonning re'isi erkin tunyaz söz qilip, “Shinjangni dölet ichi we sirtidiki sayahetchiler telpünidighan güzel makan” gha aylandurush chaqiriqi élip barghan.

Yighinda, xitay medeniyet we sayahet ministirliqi “Shinjang yaxshi jay” sayahetchiliki mexsus pilanini élan qilghan bolup, uningda pul-mu'amile organliri bilen sayahetchilik shirketliri birliship sayahetchilerni chaqirish, sayahet nuqtilirini köpeytish, bahada étibar bérish, mulazimet türini köpeytish, qatnash shara'itini yaxshilash, teshwiqatni kücheytish qatarliq mezmunlar orun alghan.

Yéqindin buyan xitay da'irilirining chet ellik sayahetchilerni Uyghur rayonigha jelp qilish üchün, türlük teshwiqat heriketlirini qanat yayduruwatqanliqi, hetta mingdin artuq sayahetchini élip kelgen chet el sayahet shirketlirini mukapatlaydighanliqini élan qilghan idi. Uyghur rayonini yéqindin közitiwatqan mutexessisler, bu xitayning barghanséri chöküwatqan iqtisadini janlandurush, shundaqla Uyghur rayonida yürgüzüwatqan irqiy qirghinchiliqini perdazlash we “Normallashturush” urunushining bir qismidur, dep qarimaqta.

Bu yil 3-ayda amérika dölet mejlisi ezaliri we kishilik hoquq sahesidiki mutexessisler, xitay teshwiq qiliwatqan “Shinjang sayahetchiliki” ni “Irqiy qirghinchiliq sayahiti” dep atap, chet el sayahet shirketlirini Uyghur rayonigha sayahet teshkillimeslikke chaqirghanidi.