Испанийәдә қанунсиз хитай көчмәнлирини орунлаштуридиған бир җинайәт гумандари қолға чүшүрүлгән

Мухбиримиз үмидвар
2016-08-28
Елхәт
Пикир
Share
Принт

Испанийә сақчи даирилири шәнбә күни сахта ишләш тохтамнамиси түзүш арқилиқ испанийәдә туруп ишләш рухсити тарқитидиған бир хитай қанунсиз көчмәнләр гуруһини тутқун қилғанлиқини билдүргән.

Әнглийә б б с агентлиқиниң хәвәр қилишичә, мәзкур шайкиға мунасивәтлик җинайәт гумандаридин 57 нәпири тутулған икән.

Игилинишичә, барселонадики хитай пуқралири мәзкур сахта ишләш тохтамиға еришиш үчүн 8 миң явро сәрп қилидиған болуп, улар мәзкур сахта тохтамнамиға еришкәндин кейин, испанийәдә туруш рухситигә игә болидикән. Сақчиларниң ениқлишичә, қанунсиз көчмәнләр алди билән лансароте арилида туруш рухситигә игә болғандин кейин, әсли тохтамда дейилгән ишларни қилмай, испанийәниң барселона шәһиригә қайтип кетип, кийим кечәк карханилирида ишләйдикән,

Испанийә сақчи даирилири һазирғичә қанчилик хитай пуқрасиниң бу хил сахта тохтам арқилиқ испанийәдә туруш рухситигә еришкәнлики һәққидә ениқ мәлумат бәрмигән болсиму, әмма бу сахта тохтам тарқитиш шайкисиниң башламчисиниң икки нәпәр әр - аял хитай гумандар икәнликини билдүргән.

Мәтбуатларда көрситилишичә, нөвәттә, явропа шәһәрлиригә келип түрлүк ишлар билән, җүмлидин сода - сетиқ ишлири билән шуғуллинип, җан беқиватқан хитай көчмәнләрниң сани ешиватқан болуп, испанийәму хитай көчмәнлири көп җайлашқан мәмликәтләрниң биридур.

Испанийәдә нөвәттә 200 миңдин артуқ хитай көчмини туруватқанлиқи һесаблап чиқилған болуп, булар қанунлуқ көчмәнләр икән, әмма қанунсиз туруватқанлар һәққидә санлиқ мәлумат йоқ.

Пикирләр (0)
Share
Толуқ бәт