Майк помпейо хитайниң җәнубий деңизда тосалғу болушиға йол қоймайдиғанлиқини билдүргән

Мухбиримиз ирадә
2019-03-01
Елхәт
Пикир
Share
Принт

Америка ташқи ишлар министири майк помпейо американиң җәнубий деңизниң хәлқараға очуқ болушиға капаләтлик қилидиғанлиқини, хитайниң буниңға тосалғу болушиға йол қоймайдиғанлиқини билдүрди.

Бирләшмә агентлиқниң хәвиридин қариғанда, америка ташқи ишлар министири майк помпейо җүмә күни филиппин пайтәхти манилада қилған сөзидә йәнә, әгәр филиппинниң һәрбий күчлири, айропилан вә парахотлири җәнубий деңизда қораллиқ һуҗумға учриса, американиң филиппинни қоғдайдиғанлиқини билдүргән.

Хәвәрдә ейтилишичә, бу, американиң узун йиллардин бери тунҗи қетим җәнубий деңиздики шерик дөләтлиригә бу һәқтә очуқ вә кәскин вәдә бериши болуп һесаблинидикән. Келәр һәптә филиппинниң дөләт мудапиә министири дәлфин лорензана америка дөләт мудапиә министирлиқини зиярәт қилидиған болуп, бу учришишниң мәқситиму америка билән шерик дөләтләр арисидики һәрбий алақини күчәйтишкә мунасивәтлик икән.

Хитайниң җәнубий вә шәрқий деңиздики игилик һоқуқ дәвасидики кәскин позитсийәси райондики дөләтләрниң наразилиқини вә хитайниң кеңәймичилики һәққидики әндишилирини күчәйткән иди.

Майк помпейо болса маниладики сөзидә: «хитайниң җәнубий деңиздики сүний арал қурулуши вә һәрбий паалийәтлири силәрниң игилик һоқуқиңлар, бихәтәрликиңлар, җүмлидин иқтисадий һаятиңларға тәһдит пәйда қилмақта. Бу, америка үчүнму тәһдит һесаблиниду» дәп әскәрткән.

Пикирләр (0)
Share
Толуқ бәт