Zumret obul asasiy ma'arip sistémisida “Jungxu'a milliti ortaq gewdisi éngi” ni omumlashturushni tekitligen

Uyghur aptonom rayonluq xelq qurultiyi da'imiy komitétining mudiri zumret obul Uyghur élide mejburiy ma'arip qanunining emeliylishish ehwalini tekshürgende qilghan sözide, mekteplerde “Jungxu'a milliti ortaq gewdisi éngi” ni keng qanat yaydurushni tekitligen.

“Tengritagh tori” ning 21-séntebir künidiki xewiride déyilishiche, zumret obul shu kündiki sözide “Ma'aripqa siyasiy nuqtidin qarash, shi jinpingning ma'arip xizmiti toghrisidiki yolyoruqini mejburiy ma'aripining nishani bilen birleshtürüsh” ni telep qilghan. U, asasiy ma'arip sistémisida, bolupmu bashlan'ghuch-ottura mekteplerning oqutush mezmunida “Shinjangni medeniyet arqiliq ozuqlandurush”, “Jungxu'a milliti ortaq gewdisi éngi” ni teshwiq qilishni qattiq kücheytishni telep qilghan.

Uyghur aptonom rayonluq xelq qurultiyi da'imiy komitétining mudiri zumret obul yéqinda xotenning niye we chira nahiyeliride tekshürüshte bolghandimu “Jungxu'a milliti ortaq gewdisi” éngini teshwiq qilishni kücheytishni tekitligen idi.

Zumret obul qeshqerde tughulghan bolup, ma shingruy Uyghur aptonom rayonigha partkom sékrétari bolup kelgendin kéyin, irqiy qirghinchiliq dawamlishiwatqan pewqul'adde bir mezgilde u qumul wilayitining waliyliqidin östürülüp, Uyghur aptonom rayonluq partkom da'imiy komitétining ezasi, birliksep bölümining bashliqi qatarliq wezipilerge qoyulghan, 2023-yili 1-ayda Uyghur aptonom rayonluq xelq qurultiyi da'imiy komitétining mudirliqigha teyinlen'gen.

Atalmish “Jungxu'a milliti ortaq gewdisi éngi” dégen bu siyasiy atalghu xitaydiki xitay bolmighan milletlerni xitaylashturushni meqset qilghan esheddiy xitay milletchikliki teshwiqatining bir parchisi bolup, yéqinqi yillardin buyan Uyghur élide keng kölemde teshwiq qilinip kelmekte.

Yéqinda Uyghur aptonom rayonluq siyasiy kéngesh da'imiy komitétining 13-nöwetlik alahide yighinida atalmish “Jungxu'a milletliri ortaq gewdisi éngi” berpa qilish toghriliq qarar maqullinip, shi jinpingning “Yéngi dewrdiki shinjangni idare qilish istratégiyesi” ni qet'iy izchillashturush؛ tarix, arxé'ologiye, medeniyet we bashqa türlük sahelerde “Jungxu'a milliti ortaq éngi” berpa qilish؛ shundaqla “Shinjang ezeldin xitayning ayrilmas bir qismi” deydighan sepseteni puqralar méngisige quyush telep qilin'ghan idi.