Калифорнийәдә бир хитай инженер башқурулидиған бомбиға даир мәхпий лайиһәни оғрилиғанлиқтин қолға елинған

Вашингтондин мухбиримиз ирадә тәйярлиди
2024.02.08

Америка пуқраси болған бир нәпәр хитай инженер американиң муһим техникисини оғрилаш җинайити билән әйиблинип қолға елинған.

NBC Хәвәрләр ториниң билдүрүшичә, америка әдлийә министирлиқи калифорнийә иштатиниң сан-хосәй районида олтурушлуқ 57 яшлиқ гоң чеңгуаңниң сода мәхпийәтликини оғрилаш җинайити билән әйибләнгәнликини билдүргән.

Сот һөҗҗитидә ашкарилинишичә, гоң чиңгуаң америка һөкүмити үчүн ясап чиқилған ядролуқ башқурулидиған бомба қоюп беришни байқаш, баллистик вә аваздин тез учидиған башқурулидиған бомбини из қоғлаш, сензор лайиһәләш қатарлиқ аләм бошлуқи системисида ишлитилидиған инфира қизил нурлуқ сензорниң лайиһәлирини оғрилиған.

Америка һөкүмити вә гоң чиңгуаң ишлигән америка ширкити әдлийә министирлиқиниң сот һөҗҗитидә “зиянкәшликкә учриғучи тәрәпләр” дегән тизимликкә киргүзүлгән. Америка һөкүмити вә бу ширкәт гоң оғрилиған техникиларни тәрәққий қилдуруш үчүн йәттә йилдин көпрәк вақит сәрп қилған һәмдә йилиға нәччә он милйон доллар мәбләғ салған икән.

Әдлийә тармақлири әгәр бу техникилар риқабәтчи ширкәтләр вә дүшмән дөләтләрниң қолиға өтүп кәткән болса, буниң мәзкур америка ширкити үчүн ғайәт зор иқтисадий зиян болупла қалмай, бәлки американиң дөләт бихәтәрликигиму зор тәһдит пәйда қилидиғанлиқини ейтқан.

Америкалиқ адвокат мартин естрада (Martin Estrada) , гоң чиңгуаңниң бурунму хитайниң һәрбий иқтидарини күчәйтиш үчүн техника җасуслуқи қилғанлиқини билдүргән. У мундақ дегән: “биз хитайни өз ичигә алған чәт әл актийорлириниң актиплиқ билән техникимизни оғрилимақчи болуватқанлиқини билимиз, биз америка карханилири вә тәтқиқатчилириниң йеңилиқлирини қоғдаш арқилиқ бу тәһдиткә қарши һошярлиқни сақлаймиз” .

NBC Телевизийәсиниң хәвәр қилишичә, америка федератсийә тәкшүрүш идариси гоң чиңгуаңниң 2014-йилдин 2022-йиллири арисида америкадики муһим пән-техника ширкәтлиридә хизмәт қиливатқан мәзгиллиридә хитай орунлаштурған “ихтисаслиқлар пирограммиси” ға бир қанчә қетим илтимас сунғанлиқини байқиған. Бу пирограмма хитайниң чәт әлләрдә яшайдиған, әмма хитайниң иқтисадий вә һәрбий ишлириға ярдәм берәләйдиған маһарәт, иқтидар вә билимгә игә кишиләрни байқашни мәқсәт қилған пирограмма болуп, гоң чиңгуаң йәнә бу йиллар ичидә бир қанчә қетим хитайға барған.

Гоң чиңгуаң әсли хитайда туғулған болуп, у 2011-йили америка пуқраси болған икән. У, 20-феврал лос-анжелста сотқа чиқидикән. Әгәр униң җинайити бекитилгән тәқдирдә, он йилғичә болған муддәтлик қамақ җазасиға һөкүм қилинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.