Каталонийәдики омуми хәлқ аваз бериш тосқунлуқ ичидә өткүзүлди

Мухбиримиз үмидвар
2017-10-01
Елхәт
Пикир
Share
Принт

Йәкшәнбә күни испанийә тәвәсидики каталонийәдә районниң мустәқиллиқи үчүн омуми хәлқ аваз бериш испанийә сақчи тәрәпниң тосқунлуқиға учриған.

Испанийә сақчилириниң каталонийәниң мустәқиллиқи үчүн омуми хәлқ аваз беришигә тосқунлуқ қилиши кишиләрниң наразилиқини қозғиған болуп, барселонада өткүзүлгән наразилиқ билдүрүш намайиши тоқунушқа айлинип, сақчи тәрәп намайишчиларға қарши резинкә оқ ишләткән вә тоқунушта аз дегәндә 460 адәм яриланған.

Б б с агентлиқиниң хәвәр қилишичә, каталонийә һөкүмити 1-өктәбир күни каталонийә райониниң давамлиқ испанийә тәркибидә қелиш яки униңдин айрилип мустәқил болушини бәлгиләйдиған омуми хәлқ аваз бериш, йәни референдум өткүзүшни қарар қилған болуп, әмма испанийә һакимийити буниңға қарши турған шуниңдәк испанийә соти буни қанунсизлиқ дәп қарап чәклигән. Испанийә сақчилири йәнә омуми хәлқ аваз бериш, йәни, референдум өткүзүшни қарар қилған бир қисим каталонийә юқири дәриҗилик әмәлдарлирини тутқун қилип, референдумға тосқунлуқ қилған. Бу әһвал бир қанчә миң кишилик наразилиқ һәрикитини кәлтүрүп чиқарған.

Вәһаләнки, ройтерс агентлиқиниң хәвәр қилишичә, омуми хәлқ аваз бериш сақчиларниң тосқунлуқиға учримиған бәзи беләт ташлар орунлирида давамлишивәргән.

Каталонийә испанийә тәркибидики каталон миллитиниң аптономийә һөкүмити болуп, нопуси 7 милйондин ашидиған мәзкур аптоном һөкүмәттә 2014-йили, бир қетим референдум өткүзүлгән вә 2015-йили каталонийә парламент сайлимида мустәқиллиқ тәрәпдаридикиләр йеримдин ашқан иди. Бу йил, 1-өктәбир күни каталонийәниң мустәқил болуп, җумһурийәт шәклидики дөләткә айлинишини бәлгиләйдиған омуми хәлқ аваз бериш бәлгиләнгән.

Пикирләр (0)
Share
Толуқ бәт