Хәлқара кәчүрүм тәшкилати хитайни лагерлар һәққидики ялған тәшвиқатлиридин ваз кечишкә чақирди

Мухбиримиз ирадә
2019-11-25
Share

Лагерларға аит мәхпий һөҗҗәтләр ашкариланғандин кейин, уйғур елидә йолға қоюлуватқан бу зор көләмлик тутқун һәрикитиниң хитайниң юқири дәриҗилик дөләт рәһбәрлири тәрипидин инчикилик билән пиланланған бир һәрикәт икәнлики айдиңлашқаниди. Буниң билән хәлқарада лагерларни тақаш вә хитай һөкүмитини җавабкарлиққа тартиш һәққидики чақириқлар күнсайин күчәймәктә.

Хәлқара кәчүрүм тәшкилати 25-ноябир дүшәнбә күни баянат елан қилип, хитай һөкүмитини уйғур елидә йүргүзүватқан қорқунчлуқ сиясәтлирини дәрһал аяғлаштурушқа чақирған.

Кәчүрүм тәшкилатиниң шәрқий асия директори лиса тасси баянаттики сөзидә: “хитай һөкүмити лагерларниң мәвҗутлуқини изчил рәт қилип кәлгән болсиму, бирақ бу ашкариланған һөҗҗәтләр сайисидә уларниң уйғур қатарлиқ аз санлиқ милләтләргә қиливатқан йиргинчлик зиянкәшликигә аит тағдәк пакитлар оттуриға чиқти” дегән.

У йәнә, һөҗҗәтләрдә ашкариланған қорқунчлуқ тәпсилатларниң өзлири лагер шаһитлиридин игилигән әһваллар билән охшаш икәнликини әскәртип: “һәр һәптә хәлқара җамаәтчилик хитай һөкүмитиниң шинҗаңдики пуқралириға қиливатқан қорқунчлуқ түзүмләр тоғрисида йеңи мәлуматлардин хәвәр тепиватиду. Әмди хитай һөкүмити лагерлар һәққидә ‛биз уларға кәспий маһарәт тәрбийәси бериватимиз‚, дегәнгә охшаш пут тирәп туралмайдиған тәшвиқатлирини тохтитидиған вақит кәлди.” дегән.

Улар йәнә баянатида төвәндики чақириқларни қилған: “хитай һөкүмити дәрһал өзиниң йеқинлиридин хәвәр елишқа тәқәзза болуп туруватқан йүз миңларчә кишигә җаваб бериши керәк. Ашкариланған һөҗҗәтләр хәлқара җамаәтни хитай һөкүмитигә зулумини аяғлаштуруш һәққидә йәниму күчлүк бесим қилишқа һәрикәтләндүрүши лазим”.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт