Kerimofning qizi gülnare kerimowaning tutqun qilin'ghanliqi resmiy bildürüldi

Muxbirimiz ümidwar
2017-08-06
Share

Yéqinda sabiq özbékistan prézidénti, merhum islam kerimofning chong qizi gülnare kerimowaning özbékistan saqchi da'iriliri teripidin tutqun qilin'ghanliqi heqqidiki uchurlar tarqalghandin kéyin, ötken charshenbe küni özbékistan bash teptish mehkimisi uning tutqun qilin'ghanliqini resmiy delillidi.

Ferghane uchur torining özbékistan uchur menbeliri asasida tarqatqan xewerliride ilgiri sürülüshiche, gülnare kerimowa hazir özbékistan milliy bixeterlik orginining ayrip tekshürüsh ornida tutup turulmaqta.

Ottura asiya uchur torining xewerliride körsitilishiche, özbékistan teptish da'iriliri téxi hazirghiche merhum özbék prézidéntining chong qizi üstidin qachan sot échilidighanliqi we uning qandaq jinayet gumanliri bilen tutqun qilin'ghanliqi heqqide izahat bermigen.Emma, közetküchiler gülnare kerimowaning 2015-yili, 21-awghust küni tashkent soti chiqarghan besh yilliq qamaq jazasigha höküm qilish délosigha asasen tutulghanliqini jezm qilmaqta.

Gülnare kerimowa bu qétim yene qaytidin, aldamchiliq, chet'el pullirini yoshurush, tamozhna qanuni we soda nizamlirini buzush, jinayet arqiliq tapqan pullirini qanunlashturush qatarliq bir yürüsh jinayetler bilen eyiblinishi mumkin iken.

45 Yashliq gülnare kerimowa bir mezgil amérikida oqughan we yashighan. 2008-2013-Yilliri arisida u özbékistandiki eng tesiri küchke ige siyasiyon we tijaret adimige aylan'ghan bolup, hetta uning kelgüside dadisining ornigha özbékistan prézidénti bolushi éhtimalliqi heqqidiki perezlermu otturigha chiqqan, biraq kéyin uning dadisi bilen bolghan munasiwiti buzulghan hemde 2015-yili uninggha besh yilliq qamaq jazasi höküm qilin'ghan idi. Mana emdi islam kerimof wapatigha bir yil toshush aldida u resmiy türde tutqun qilindi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet