Йәкән наһийәсидики көмүрканда йүз бәргән вәқәдә өлгәнләрниң сани 5 кә йәтти

Мухбиримиз әркин
2016-04-08
Елхәт
Пикир
Share
Принт

Уйғур райониниң йәкән наһийәсидики көмүр канда 3‏-апрел күни йүз бәргән вәқәдә өлгән адәм сани 5 кә йәткән. Хитай ахбарати дәсләпки хәвиридә 3 адәм өлгәнликини, 7 адәмниң кан астида қамилип қалғанлиқини хәвәр қилған.

Йәкән наһийәсидики «тйәнли» намлиқ хитай көмүр кан ширкитиниң кан қудуқида йүз бәргән вәқә, кан қудуқиниң гүмүрүлүп чүшүши сәвәблик келип чиққан.

Наһийәлик көмүркан бихәтәрлик даирилириниң шинхуа агентлиқиға билдүрүшичә, қутқузуш әтрити сәйшәнбә күни икки 2 җәсәт тапқан. Даириләр, йәнә 5 адәмниң қудуқ астида давамлиқ қамилип ятқанлиқини билдүргән болсиму, әмма уларниң өлүк-тириклики һәққидә һечқандақ учур бәрмигән.

3‏-Апрел саәт 2:50 ләрдә кан қудуқи гүмүрүлүп чүшкәндә кан астида 19 ишчи мәшғулат елип бериватқан икән. Йәрлик даириләрниң билдүрүшичә, вәқәдин кейин кан инженери, кан башлиқи вә башқа мәсул кишиләр тутқун қилинған.

Хитай кан вәқәлири дуняда әң көп йүз беридиған вә әң көп адәм өлидиған дөләт. Әмма уйғур паалийәтчилириниң илгири сүрүшичә, уйғур райониниң көмүр байлиқини қалаймиқан вә пилансиз қезиш паалийити кан бихәтәрлик тәдбирлириниң бошап, районда кан вәқәлириниң көпләп йүз беришидики асаслиқ сәвәб болуп қалған.

Бу қетим кан вәқәси йүз бәргән «тйәнли» көмүр кени йәкән наһийә базиридин 110 километир йирақлиқта икән.

Толуқ бәт