Куча шәһири әтрапида 5.5 Бал йәр тәвриди

“хитай йәр тәврәшни көзитиш тори” елан қилған учурдин мәлум болушичә, 8-айниң 22-күни 7 дин 38 минут өткәндә, куча шәһири әтрапида 5.5 Бал йәр тәвригән, йәр тәврәш чоңқурлуқи 15 миң метирға йәткән.

“хитай хәвәрлири тори” му 22-авғуст күни бу һәқтә хәвәр бәргән болуп, йәр тәврәш дәриҗисини 5 бал дәп елан қилған һәмдә һечқандақ өлүм-йетим, зәхимлиниш яки мал-мүлүк зиянға учраш әһвали йүз бәрмиди дегән. Бу йәр тәврәшниң тәсири бай, шаяр, бүгүр наһийәлири вә арал шәһиридиму сезилгән.

Хәвәрдә ейтилишичә, йәр тәврәш йүз бәргәндин кейин куча шәһири “3-дәриҗилик җиддий қоғдиниш” һәрикити қозғап, от өчүрүш әтрәтлирини апәт йүз бәргән җайға әвәткән; шундақла кучадики кан-мәдән тағлири, карханилар, айродурум вә су амбарлириға адәм әвәтип, көрүлгән һадисиләрни тәкшүргән. Йәни хитай даирилири алди билән һөкүмәтниң муһим әслиһәлирини қоғдашқа күч аҗратқан.

Бу йил киргәндин буян куча шәһири йәр тәврәшниң сәзгүр районлиридин биригә айлинип қалған. Мәлуматлардин қариғанда, 5-айниң 8-күниму куча шәһириниң ғәрби шималидики 108 километир даиридә 3.8 Бал йәр тәвригән; униңдин нәқ бир ай бурун, йәни 9-апрел күни куча шәһириниң шәрқий шималидики 81 километир даиридә 4.2 Бал йәр тәвригән.

Бу йил 23-январ күни ақсуниң учтурпан наһийәсидә 7.1 Бал йәр тәвригән болуп, хитай таратқулири бу йәр тәврәштә пәқәт үч адәмниң өлүп, бәш адәмниң яриланғанлиқини, әмма башқа өлүм-йетим һадисилириниң йүз бәрмигәнликини хәвәр қилғаниди.

Хитай даирилири йәр тәврәшкә даир учурларни қамал қилип келиватқан болуп, апәт йүз бәргән күнләрдә һөкүмәтниң уқтуруш чиқирип, йәр тәврәшкә аит “сахта учур” яки “өсәк сөз” тарқатқанларни җазалайдиғанлиқини билдүргәнлики мәлум болғаниди.