Малайшия дөләт мудапиә министири: «уйғур мусулманлири учраватқан муамилигә сүкүт қилмидуқ»

Мухбиримиз әркин
2019-04-22
Елхәт
Пикир
Share
Принт

Малайшия дөләт мудапиә министири муһәммәд сабу, малайшияниң хитайниң уйғур мусулманлириға тутқан муамилисигә сүкүт қиливатқанлиқи һәққидики пикирни рәт қилип, малайшияниң дипломатик қаналлар арқилиқ мәзкур мәсилигә болған наразилиқини ипадиләп келиватқанлиқини билдүргән. «Малай почтиси гезити» ниң 21‏-апрел хәвәр қилишичә, муһәммәд сабу бу сөзләрни йеқинда «малай почтиси гезити» ниң зияритини қобул қилғанда ашкарилиған.

У, «биз ташқи ишлар министирлиқиниң башчилиқида давамлиқ дипломатик қаналларни ишлитимиз. Ташқи ишлар министири хитайда йүз бериватқан бу һадисини өзара сөһбәтлиридә изчил оттуриға қоюп кәлмәктә» дегән. 

Малайшия хитайниң уйғурларни кәң көләмлик тәқибләп, 2 милйондәк уйғур вә башқа мусулманларни йиғивелиш лагерлириға қамишиға наразилиқ билдүргән тунҗи мусулман дөлити. У, 2017‏-йили тайланд түрмисидин қечип өткән 11 нәпәр уйғурни хитайға қайтуруп беришни рәт қилип, өткән йили 10‏-айда уларни түркийәгә йолға селип қойған иди. 

Муһәммәд сабу йәнә, бәлким бу ишларниң ашкара елан қилинмаслиқи мумкинлики, лекин униң дипломатик йоллар билән икки дөләт оттурисида давамлиқ музакирә қилинидиғанлиқини билдүргән. Хәвәрдә қәйт қилинишичә, «малай почтиси гезити» ниң мухбири малайшия һөкүмитиниң исраилийәни тәнқид қилишта актип болсиму, лекин немә үчүн хитайниң уйғур мусулманлириға тутқан муамилисигә сүкүт қилидиғанлиқини сориған. Муһәммәд сабу йеқинқи икки һәптә ичидә уйғур мәсилисигә инкас билдүргән чәтәлниң 2‏-дөләт мудапиә әмәлдари. Алдинқи һәптә америка дөләт мудапиә министирлиқиниң ярдәмчи министири рәнди шрайвер америкадики хадсон институтида өткүзүлгән бир йиғинда уйғур мәсилисини тилға алған. У американиң хитай вә явропа иттипақи билән болған мунасивити һәққидә тохтилип, «шинҗаңдики инсанийәт трагедийәси ташқи дуняға намәлум һаләттә турмақта» дегән иди.

Пикирләр (0)
Share
Толуқ бәт