Америка һөкүмити мәҗбурий әмгәккә четишлиқ пахта мәһсулатлирини чәкләйдикән

“уйғур мәҗбурий әмгикиниң алдини елиш қануни” 21-июндин башлап иҗра қилинғандин кейин, америка таможна вә чегра қоғдаш идариси мәҗбурий әмгәк билән четишлиқи бар дәп бекиткән малларни тутуп қалидикән. Буниң ичидә уйғур районидин келидиған пахта вә пахта мәһсулатлири әң зор салмақни игиләйдикән.

“муһапизәтчи” ториниң хәвиридә ейтилишичә, мәзкур қанунниң йолға қоюлуши америка вә башқа дөләтләрдики кийим-кечәк карханилириға наһайити чоң тәсир көрситидикән. Чүнки дунядики пахтиниң 20 пирсәнти хитайдин келидикән, хитайдики пахтиниң 80 пирсәнти уйғур районидин чиқидикән.

Даңлиқ кийим-кечәк кархана мәсуллириниң билдүрүшичә, “шинҗаң пахтиси” ниң мал тәминләш зәнҗири наһайити кәң икән. Пахтини чигиттин айриған чағда һәр қайси җайлардин келидиған пахтилар бир-биригә арилишип кәткәчкә, униң нәдин келидиғанлиқини асан айриғили болмайдикән.

Шундақтиму һазир пахта тоқумичилиқ мәһсулатлириниң тәркибини тәһлил қилип, униң келиш мәнбәсини ениқлайдиған техника ширкәтлири бөләк зәнҗири (block chain) вә әқлий иқтидарлиқ из қоғлаш техникиси арқилиқ даңлиқ мәһсулатларниң мал тәминләш линийәсини тәкшүрәләйдикән.

Trus Trace Ширкити мәсулиниң билдүрүшичә, даңлиқ маркилар өз мәһсулатлириға “шинҗаң пахтилири” ниң арилишип қалмиғанлиқини испатлаш үчүн, шу пахта чиқидиған җайдин тартип мәһсулатқа айланғучә пүтүн мал тәминләш линийәсигә аит санлиқ мәлуматларни көрситиши керәк икән.