Майк помпейо: «биз (уйғур мәсилисидә) болупму мусулман дөләтлириниң зуван сүрүшигә еһтияҗлиқ»

Мухбиримиз әркин
2019-09-27
Елхәт
Пикир
Share
Принт

Америка ташқи ишлар министири майк помпейо 26‏-сентәбир күни ню-йорк шәһиридә ахбарат йиғини өткүзүп, уйғур мәсилисидә техиму көп дөләтләрниң, болупму мусулман дөләтлириниң зуван сүрүши керәкликини билдүргән.

У ахбарат йиғинида сүрийә, иран вә уйғур мәсилисини өз ичигә алған нуқтилиқ 3 мәсилә һәққидә тохталған. Майк помпейо уйғурлар һәққидә тохталғанда б д т ниң бу нөвәтлик йиллиқ йиғини җәрянида өткүзүлгән уйғурлар һәққидики йиғинға 30 нәччә дөләтниң иштирак қилғанлиқини билдүрүп, бирақ бу мәсилигә техиму көп дөләтләрниң иштирак қилиши, болупму мусулман дөләтлириниң иштирак қилиши керәкликини тәкитлигән. 

Америка ташқи ишлар министирлиқиниң учурида қәйт қилинишичә, майк помпейо мундақ дегән: «президент трамп б д т да хәлқара диний әркинлик йиғиниға саһибханилиқ қилди. Биз йиғинда шаһитларниң йүрәкни дағлиғудәк кәчмишлирини аңлидуқ. Шундақла ташқи ишлар министирлиқи әнглийә, германийә, голландийә, канада қатарлиқ дөләтләрниң ортақ саһибханилиқида хитайниң бир милйондин артуқ уйғур мусулманлирини шинҗаңдики йиғивелиш лагерлирида тутуп туруватқанлиқ мәсилиси тема қилинған паалийәт өткүзди.» 

Майк помпейониң илгири сүрүшичә, гәрчә бу паалийәткә 30 нәччә дөләт қатнашқан болсиму, лекин бу йетәрлик әмәс икән. У «биз техиму көп дөләтләрниң, болупму мусулманлар көп санлиқни игиләйдиған дөләтләрниң 21‏-әсиридики бу қорқунчлуқ кишилик һоқуқ дәпсәндичиликигә қарши авазини чиқиришиға еһтияҗлиқ,» дегән. 

Помпейо бу сөзләрни хитай ташқи ишлар министири ваң йи 25‏-сентәбир б д т хәвпсизлик кеңишидә сөз қилип, хитайниң уйғур районидики аталмиш «радикаллиқни түгитиш» тәдбирлирини ақлиғандин кейинла қилди. Ваң йи хәвпсизлик кеңишидә уйғур районидики «радикаллиқни түгитиш» тәдбирлирини «хитайниң хәлқара террорлуққа қарши туруш күришигә қошқан муһим төһписи» дәп тәриплигән иди. Кишилик һоқуқ тәшкилатлириниң илгири сүрүшичә, нөвәттә хитай һөкүмити 2 милйондәк уйғурни бу лагерларда тутуп турмақта икән.

Пикирләр (0)
Share
Толуқ бәт