Mongghul kishilik hoquq pa'aliyetchisi xadaning ayali shinna xanim xitay prézidénti shi jinpinggha mektup yollap, yoldishining qoyup bérilishini telep qildi.
Jenubiy mongghuliye kishilik hoquq we uchur merkizining istansimizgha bildürüshiche, shinna xanim mektupida yoldishining hazirqi salametlik ehwalining nacharliqini, xitay hökümitining yoldishini qanunsiz tutup turushni ayaghlashturup, uni derhal qoyup bérishi kéreklikini éytqan.
50 Yashlar chamisidiki xada "Bölgünchilik" we "Jasusluq" jinayiti bilen eyiblinip 15 yilliq qamaq jazasigha höküm qilin'ghan. Uning jaza mudditi 2010-yili dékabirda toshqan bolsimu, xitay da'iriliri uni dawamliq tutup turmaqta.
Shinna xanim we uning oghli hazir xitay da'irilirining küchlük teqibige uchrawatqan bolup, da'iriler ulargha kökxottin ruxsetsiz halda ayrilsa bolmaydighanliqini uqturghan we ularning kirim menbesi bolghan kitabxanini péchetliwetken. Biraq qiziqarliqi, yerlik saqchilar shinna xanimgha özlirining ulargha iqtisadiy yardem qilip, chong öy élip béridighanliqini éytqan. Shinna xanim bu tekliplerni ret qilip "Bizge xitay da'irilirining atalmish yardimi kérek emes, bizge erkinlikimiz kérek. Ademdek yashash hoquqimiz kérek. Eger bizge bu hoquqlirimizni berse biz ularning yardimisizmu yashiyalaymiz" dégen.
