«Шинҗаң университети» ниң мудирлиқ вәзиписигә тунҗи қетим бир хитай тәйинләнгән

Мухбиримиз ирадә
2020-09-24
Елхәт
Пикир
Share
Принт

Уйғур елидики узун тарихқа вә нопузға игә болған алий билим юртлиридин «шинҗаң университети» ниң башлиқлиқ вәзиписи уйғур аптоном райони тарихи бойичә тунҗи қетим бир хитайға берилгән. «Шинҗаң университети» тор бетидики хәвәрдин қариғанда, «шинҗаң университети» ниң мудирлиқ вәзиписигә яв чяңни тәйинләш қарарини 9-айниң 22-күни чүштин кейин уйғур аптоном районлуқ партком вә аптоном районлуқ хәлқ һөкүмити мәхсус йиғин арқилиқ җакарлиған.

Мәлум болушичә, «шинҗаң университети» ниң башлиқлиқиға уйғур аптоном райони қурулғандин буян изчил һалда уйғурлар тәйинлинип келингән болуп, бу қетимқи бу өзгириш чәтәлләрдики уйғур зиялийлириниң күчлүк диққәт-етибарини қозғиди. Бир қисим уйғур зиялийлири бу һәқтә иҗтимаий таратқуларда мулаһизә қилип, буниң уйғур тарихидики бурулуш характерлик вәқәликини билдүрди.

Мәлум болушичә, яв чяң 2019-йили 2-айда «шинҗаң университети» да хизмәткә чүшкән болуп, хәвәрдә униң тәрҗимиһали һәққидә толуқ мәлумат берилмигән. Хәвәрдә уни мудирлиққа өстүрүш қарари «аптоном районлуқ партийә комитети билән мәркизий тәшкилат бөлүми вә маарип министирлиқи оттурисидики қайта-қайта пикир алмаштуруш һәм кеңишишниң нәтиҗиси» дейилгән вә «бу қарар. . . Кәлгүси тәрәққиятниң еһтияҗи, у шинҗаң университети рәһбәрликиниң интайин муһимлиқини толуқ әкс әттүрди» дәп тәрипләнгән.

«Шинҗаң университети» 2017-йили хитай һөкүмити уйғур елидә йолға қойған кәң көләмлик тутқун һәрикитиниң еғир зәрбисигә учриған алий маарип орунлириниң биридур. Болупму университетниң рәһбәрлик қатлимидики вә оқутуш сепидики бирқисим уйғур рәһбәрләр вә оқутқучилар бирдәк тутқун қилинған. Һазирға қәдәр шинҗаң университетидин ташполат тейип, мәрһум абдукерим раһман, раһилә давут, зулпиқар барат қатарлиқ 15 әтрапида рәһбирий вә илмий хадимниң тутқун қилинғанлиқи дәлилләнгән һәм булардин бирнәччисиниң кейин қоюп берилгәнлики ашкариланғаниди. Һәтта «шинҗаң университети» мудири ташполат тейипниң вәзиписидин елип ташлинип вә тутқун қилинип, арқидин өлүмгә һөкүм қилинғанлиқ учуриму оттуриға чиққаниди. Шинҗаң университетидин тутуп кетилгәнлики иҗтимаий таратқуларда кәң хәвәр қилинған көп сандики оқутқучиларниң ақивити та һазирғичә мәлум әмәс. Мәсилән, профессор батур әйса, абдуреһим маһмут, нурбийә ядикар, нәбиҗан һәбибулла, асийә муһәммәдсалиһ, абдусалам аблимит қатарлиқлар та һазирғичә «шинҗаң университети» динла из-дерики мәлум болмайватқан илмий хадимларниң бир қисмидур.

Пикирләр (0)
Share
Толуқ бәт