Оқуғучи мутәллип имин уйғур аптоном районлуқ җ х назарити үстидин әрз қилди

Бу йил 7-айда түркийәгә қайтиш сәпиридә бейҗиң айродромида, хитай сақчилири тәрипидин тутуп қелинип, үрүмчидики мәлум меһманханиға 79 күн қанунсиз солинип, сорақ қилинғандин кейин, паспорти вә кимлики тартивелинип, хотәндики өйигә нәзәрбәнд қилинған истанбул университетиниң оқуғучиси мутәллип имин 25-ноябир күни уйғур аптоном районлуқ җ х назарити үстидин бейҗиңдики хитай әрзийәт идарисигә әрз қилди.

Уйғур биз ториниң 26-ноябир күни бу һәқтә елан қилған хәвиридә дейилишичә, мутәллип имин уйғурбиз тори мухбириға өзиниң 21-ноябир күни дөләтлик әрзийәт ишханисиниң тор бекити, тәңритағ тор бекитидә очуқ хәт елан қилип, 79 күн қанунсиз тутқун қилинип сорақ қилинғандин кейинму давамлиқ нәзәрбәнд қилиниватқанлиқи һәққидә уйғур аптоном районлуқ җ х назаритиниң әрз қилиш хәт сандуқиға вә уйғур аптоном районлуқ җ х назаритиниң назириниң хәт сандуқиға әрз әвәткән болсиму, әрзиниң җавабсиз қалғанлиқини билдүргән.

Мутәллип имин илгириму бирнәччә қетим торда очуқ хәт елан қилған болуп, у уйғурбиз тори мухбириға торда очуқ хәт елан қилиш арқилиқ, әрз қилиш йолини таллиғанлиқини билдүрүп, “мән өзүмниң кишилик һоқуқ паалийитимни тор бекәтлири арқилиқ давамлаштуруш йолини таллидим. Һазирғичә, дөләтлик әрзийәт идарисиниң тор бекити, тәңритағ ториниң қанун сәһиписи, уйғур аптоном районлуқ җ х назаритиниң тор бекити вә аптоном районлуқ җ х назарити назириниң шәхси хәт сандуқиға әрз хәтлиримни әвәттим” дегән.

Мутәллип имин йәнә бундақ қилиш арқилиқ пәқәт өзиниңла қануний һоқуқини қоғдаш әмәс, бәлки чәтәлдә оқуватқан уйғур оқуғучиларниң вәтән зиярити җәрянида йолуқуватқан тәһдит вә аваричиликлирини паш қилмақчи икәнликини әскәрткән.