Oqughuchi mutellip imin Uyghur aptonom rayonluq j x nazariti üstidin erz qildi

Bu yil 7-ayda türkiyege qaytish sepiride béyjing ayrodromida, xitay saqchiliri teripidin tutup qélinip, ürümchidiki melum méhmanxanigha 79 kün qanunsiz solinip, soraq qilin'ghandin kéyin, pasporti we kimliki tartiwélinip, xotendiki öyige nezerbend qilin'ghan istanbul uniwérsitétining oqughuchisi mutellip imin 25-noyabir küni Uyghur aptonom rayonluq j x nazariti üstidin béyjingdiki xitay erziyet idarisige erz qildi.

Uyghur biz torining 26-noyabir küni bu heqte élan qilghan xewiride déyilishiche, mutellip imin Uyghurbiz tori muxbirigha özining 21-noyabir küni döletlik erziyet ishxanisining tor békiti, tengritagh tor békitide ochuq xet élan qilip, 79 kün qanunsiz tutqun qilinip soraq qilin'ghandin kéyinmu dawamliq nezerbend qiliniwatqanliqi heqqide Uyghur aptonom rayonluq j x nazaritining erz qilish xet sanduqigha we Uyghur aptonom rayonluq j x nazaritining nazirining xet sanduqigha erz ewetken bolsimu, erzining jawabsiz qalghanliqini bildürgen.

Mutellip imin ilgirimu birnechche qétim torda ochuq xet élan qilghan bolup, u Uyghurbiz tori muxbirigha torda ochuq xet élan qilish arqiliq, erz qilish yolini tallighanliqini bildürüp, “Men özümning kishilik hoquq pa'aliyitimni tor béketliri arqiliq dawamlashturush yolini tallidim. Hazirghiche, döletlik erziyet idarisining tor békiti, tengritagh torining qanun sehipisi, Uyghur aptonom rayonluq j x nazaritining tor békiti we aptonom rayonluq j x nazariti nazirining shexsi xet sanduqigha erz xetlirimni ewettim” dégen.

Mutellip imin yene bundaq qilish arqiliq peqet öziningla qanuniy hoquqini qoghdash emes, belki chet'elde oquwatqan Uyghur oqughuchilarning weten ziyariti jeryanida yoluquwatqan tehdit we awarichiliklirini pash qilmaqchi ikenlikini eskertken.