Уйғур елида үндидарда башқиларға намаз оқушни өгәткән бир туңган 2 йиллиқ кесилгән

Мухбиримиз әркин
2017-09-11
Елхәт
Пикир
Share
Принт

Уйғур аптоном райониниң или областида өзиниң үндидар топидикиләргә намаз оқушни өгитип қолға елинған бир туңган диний зат бу йил 3‏-айда или областлиқ сот мәһкимиси тәрипидин 2 йиллиқ қамақ җазасиға һөкүм қилинған.

Хитайда чиқидиған «йәр шари вақит гезити» ниң дүшәнбә күни ашкарилишичә, 49 яшлиқ хуң шике исимлик бу туңган пуқраси 2016‏-йили 6‏-ай вә 8‏-айда айрим-айрим икки үндидар топи қуруп, һәр бир топтики бирәр йүздәк топ әзалириға диний сават бәргән вә намаз оқушни өгәткән. 

Хәвәрдә, хуң шикениң юқириқи һәрикити сәвәблик 2016‏-йили 24‏-авғуст күни қолға елинғанлиқи қәйт қилинған болсиму, бирақ униң или областидики конкрет турушлуқ орни тилға елинмиған. Хитай һөкүмити уйғур илида йеқинқи йиллардин бери диний паалийәтләрни контрол қилишни изчил күчәйтип, тор яки башқа иҗтимаий алақә вастилирида диний тәблиғ қилиш, диний сават бериш, диний китабларни тонуштуруш, диний мәзмунларни муназирә қилишни пүтүнләй чәклигән.

Хитай һөкүмити 2015‏-йили җинайи ишлар қануниға түзитиш киргүзүп, юқириқи һәрикәтләрни торда елип бериш қанунсиз «җинайи қилмиш» дәп елан қилған. Бирақ хитайниң бу һәрикити кишилик һоқуқ тәшкилатлириниң тәнқидигә учриған. Улар буниң диний әркинликни боғуп, нурғун кишиниң наһәқ җазалинишиға сәвәб болидиғанлиқини илгири сүргән иди. 

«Йәр шари вақти гезити» ниң ашкарилишичә, хитай даирилири хуң шикени «ғәйрий диний сорунда диний тәблиғ вә диний сават бәргән, нормал диний паалийәтләр һәққидики мәмурий буйруққа хилаплиқ қилип, паракәндичилик пәйда қилған. Диний ишлар башқуруш қануниға хилаплиқ қилип, җәмийәткә зиян салған,» дегән җинайәтләр билән әйиблигән.

Пикирләр (0)
Share
Толуқ бәт